పాకిస్థాన్ ఆక్రమిత కాశ్మీర్ (PoK) పరిధిలోని ముజఫరాబాద్ సమీపంలో పాకిస్థాన్ సైన్యానికి చెందిన ఎంఐ-17 (Mi-17) హెలికాప్టర్ ఘోర ప్రమాదానికి గురైంది. సాంకేతిక లోపం కారణంగా టేకాఫ్ అయిన కొద్దిసేపటికే ఈ హెలికాప్టర్ కుప్పకూలిపోయింది. ప్రమాదం జరిగిన వెంటనే ఘటనా స్థలంలో భారీగా పొగలు అలుముకున్నాయి. ఈ ప్రమాదంలో హెలికాప్టర్లో ఉన్న సైనిక సిబ్బంది అంతా మరణించినట్లు పాకిస్థాన్ మిలిటరీ విభాగం (ISPR) అధికారికంగా ధృవీకరించింది.
ప్రమాద సమయంలో హెలికాప్టర్లో ఎంతమంది ప్రయాణిస్తున్నారనే ఖచ్చితమైన సంఖ్యను సైన్యం ఇంకా అధికారికంగా వెల్లడించలేదు. అయితే, స్థానిక నివేదికల ప్రకారం.. ఆ ప్రాంతంలో భద్రతా విధుల కోసం మోహరించిన పారామిలట్రీ రేంజర్స్ సిబ్బంది ఇందులో ఉన్నట్లు తెలుస్తోంది. ప్రమాదం జరిగిన వెంటనే రంగంలోకి దిగిన సహాయక చర్యల బృందాలు బాధితులను స్థానిక ఆసుపత్రికి తరలించాయి. హెలికాప్టర్లో ఉన్నవారెవరూ ప్రాణాలతో బయటపడలేదని ఆర్మీ స్పష్టం చేసింది.
ముజఫరాబాద్ రీజియన్లో గత కొన్ని రోజులుగా స్థానిక ఆందోళనల కారణంగా ఉద్రిక్త పరిస్థితులు నెలకొన్న నేపథ్యంలో ఈ ప్రమాదం జరగడం గమనార్హం. అయితే, ఈ ప్రమాదానికి అంతర్గత ఆందోళనలకు ఎటువంటి సంబంధం లేదని, కేవలం సాంకేతిక లోపమే కారణమని సైన్యం ప్రాథమికంగా తెలిపింది. ఈ ఘోర ప్రమాదంపై సమగ్ర దర్యాప్తునకు ఆదేశించామని, పూర్తి వివరాలు సేకరిస్తున్నామని పాక్ సైనిక వర్గాలు వెల్లడించాయి.
