మణుగూరు;
మణుగూరు మండలం సమితి సింగారం గ్రామపంచాయతీలో 99 రోజుల ప్రజాపాలన ప్రగతి ప్రణాళిక బుధవారం గ్రామసభ ఘనంగా నిర్వహించబడింది. ఈ కార్యక్రమానికి ఎమ్మెల్యే పాయం వెంకటేశ్వర్లు ముఖ్య అతిథిగా హాజరయ్యారు. గ్రామ ప్రజలతో ఆత్మీయంగా మాట్లాడిన ఆయన, వారి సమస్యలను నేరుగా తెలుసుకున్నారు. ప్రభుత్వ పథకాల అమలు పరిస్థితిని సమీక్షిస్తూ, ప్రజలకు అందుతున్న సేవలపై వివరాలు సేకరించారు.
ఈ సందర్భంగా ఎమ్మెల్యే మాట్లాడుతూ, గ్రామాభివృద్ధికి ప్రజలే దిశానిర్దేశం చేయాలని పేర్కొన్నారు. ప్రజల భాగస్వామ్యం లేకుండా సుసంపన్న గ్రామ నిర్మాణం సాధ్యం కాదని స్పష్టం చేశారు. గ్రామ ప్రజల అభిప్రాయాలు, సూచనలే అభివృద్ధికి మార్గదర్శకాలని తెలిపారు. ప్రతి కుటుంబానికి ప్రభుత్వ సంక్షేమ పథకాలు సక్రమంగా అందేలా చర్యలు తీసుకుంటున్నామని చెప్పారు.
గ్రామంలో తాగునీరు, రహదారులు, విద్యుత్, పారిశుధ్యం, విద్య, ఆరోగ్యం వంటి ప్రాథమిక అవసరాలపై ప్రత్యేక దృష్టి పెట్టాలని అధికారులకు ఆదేశించారు. అభివృద్ధి పనులను వేగవంతం చేసి, ప్రజలకు మెరుగైన సౌకర్యాలు అందించాలన్నారు. ప్రజల సమస్యలను శ్రద్ధగా విన్న ఎమ్మెల్యే, వాటి పరిష్కారానికి తక్షణ చర్యలు తీసుకోవాలని సూచించారు.
ప్రభుత్వం చేపట్టిన సంక్షేమ, అభివృద్ధి కార్యక్రమాలపై అన్ని శాఖల అధికారులు గ్రామ ప్రజలకు అవగాహన కల్పించారు. అందుబాటులో ఉన్న అవకాశాలను సద్వినియోగం చేసుకోవాలని ప్రజలకు పిలుపునిచ్చారు. అనంతరం గ్రామ ప్రజలు తమ సమస్యలను దరఖాస్తుల రూపంలో ఎమ్మెల్యేకు అందజేశారు. ఎమ్మెల్యే ప్రతి దరఖాస్తును స్వీకరించి, సంబంధిత అధికారులకు వెంటనే చర్యలు తీసుకోవాలని ఆదేశించారు. ఈ కార్యక్రమంలో తాసిల్దార్ అద్దంకి నరేష్, ఎంపీడీవో వెంకటేశ్వరరావు, స్పెషల్ ఆఫీసర్ స్వర్ణ జ్యోతి, ఆర్డబ్ల్యుఎస్ ఏఈ అరుంధతి, అగ్రికల్చర్ ఆఫీసర్ హారిక, ఎలక్ట్రికల్ ఏఈ లారెన్స్, ఐసీడీఎస్ సూపర్వైజర్ భద్రమ్మ, విద్యాశాఖ అధికారి నరసయ్య, సూపరింటెండెంట్ గౌరీ ప్రసాద్, ఏపీఎం ఐకెపి సత్యనారాయణ తదితరులు పాల్గొన్నారు.
మండల అధ్యక్షులు పిరినాకి నవీన్, శివ సైదులు, దుగ్గంపూడి ఈశ్వర్ రెడ్డి, సింగారం సర్పంచ్ కలబోయిన మాధవరావు, ఉప సర్పంచ్ గాండ్ల సురేష్, వార్డు సభ్యులు రహీం పాషా, మాదాటి రాజేష్, కొలపిన్ని మానస, కృష్ణవేణి, శ్రీదేవి, మంగతాయారు, మహిళా అధ్యక్షురాలు కూరపాటి సౌజన్య, మాజీ సర్పంచ్ కాటబోయిన నాగేశ్వరరావు, దొబ్బల వెంకటప్పయ్య, గణేష్ తదితర ప్రజాప్రతినిధులు హాజరయ్యారు.
అలాగే సిపిఎం నాయకులు నెల్లూరు నాగేశ్వరరావు, కాంగ్రెస్ పార్టీ నాయకులు కూడా పాల్గొని కార్యక్రమాన్ని విజయవంతం చేశారు. గ్రామసభలో ప్రజలు ఉత్సాహంగా పాల్గొని తమ అభిప్రాయాలను వ్యక్తపరిచారు. ఎమ్మెల్యే పాయం వెంకటేశ్వర్లు నియోజకవర్గ అభివృద్ధికి చేస్తున్న కృషిని పలువురు అభినందించారు.
ఈ గ్రామసభ ప్రజాపాలనకు నూతన దిశానిర్దేశం చేసినదిగా, గ్రామాభివృద్ధికి ప్రజల భాగస్వామ్యాన్ని మరింత బలోపేతం చేసినదిగా పేర్కొనవచ్చు.
