ఖమ్మం, రఘునాథపాలెం: ఇంట్లో ఉన్న ఓ బాలికను మాయమాటలతో తీసుకెళ్లి లైంగిక దాడికి పాల్పడిన పోక్సో కేసు నిందితుడికి 20 ఏళ్ల కఠిన కారాగార శిక్షతో పాటు రూ.30 వేల జరిమానా విధిస్తూ ఖమ్మంలోని మొదటి ఫాస్ట్ట్రాక్ కోర్టు, అదనపు జిల్లా మరియు సెషన్స్ న్యాయమూర్తి బి. శ్రీనివాసరావు శుక్రవారం తీర్పు వెలువరించారు. ఈ విషయాన్ని రఘునాథపాలెం పోలీస్ స్టేషన్ ఇన్స్పెక్టర్ ఉస్మాన్ షరీఫ్ తెలిపారు.
ప్రాసిక్యూషన్ కథనం ప్రకారం, రఘునాథపాలెం మండలం గణేశ్వరారం గ్రామానికి చెందిన మాలోత్ హుస్సేన్ (27) 2024 ఏప్రిల్ 25న ఓ బాలికను బలవంతంగా ఇంటి నుంచి తీసుకెళ్లినట్లు ఆమె తల్లిదండ్రులు ఫిర్యాదు చేశారు. ఈ మేరకు రఘునాథపాలెం పోలీస్ స్టేషన్లో క్రైమ్ నెం.127/2024 కింద ఐపీసీ సెక్షన్లు 366(ఏ), 376తో పాటు పోక్సో చట్టం-2012లోని సెక్షన్ 5 r/w 6 కింద కేసు నమోదు చేశారు.
పోలీసులు వేగవంతంగా విచారణ చేపట్టి, సాక్ష్యాధారాలు, వైద్య నివేదికలు సేకరించి కోర్టులో చార్జిషీట్ దాఖలు చేశారు. కేసుకు సంబంధించిన అన్ని ఆధారాలను పరిశీలించిన న్యాయస్థానం నిందితుడిపై మోపిన అభియోగాలు రుజువయ్యాయని నిర్ధారించి 20 ఏళ్ల కఠిన కారాగార శిక్షతో పాటు రూ.30 వేల జరిమానా విధించింది.
ఈ కేసులో ప్రభుత్వ తరఫున అదనపు పబ్లిక్ ప్రాసిక్యూటర్ శరత్ కుమార్ రెడ్డి వాదనలు వినిపించారు. కేసు విచారణలో కీలక పాత్ర పోషించిన అప్పటి ఇన్స్పెక్టర్ శ్రీహరి, ప్రస్తుత ఇన్స్పెక్టర్ ఉస్మాన్ షరీఫ్, భరోసా లీగల్ ఆఫీసర్ ఎం. ఉమారాణి, కోర్టు కానిస్టేబుల్ సాంబశివరావు, కోర్టు లైజనింగ్ ఆఫీసర్ శ్రీకాంత్, హోంగార్డ్ చిట్టిబాబును ఖమ్మం పోలీస్ కమిషనర్ సునీల్ దత్ అభినందించారు.ఈ కాపీని నేరుగా వార్తగా లేదా వెబ్సైట్లో ప్రచురించవచ్చు.
