పుట్టగొడుగులు కేవలం రుచికి మాత్రమే కాకుండా ఆరోగ్యానికి కూడా ఎంతో మేలు చేస్తాయి. ప్రస్తుతం మార్కెట్లో బటన్, ఆయిస్టర్, మిల్క్ మష్రూమ్స్ వంటి పలు రకాలు సులభంగా దొరుకుతున్నాయి. అయితే వీటిలో తేమ శాతం ఎక్కువగా ఉండటంతో కొద్ది రోజులకే జిగటగా మారడం, రంగు మారడం లేదా పాడైపోవడం సాధారణంగా కనిపిస్తుంది. సరైన పద్ధతుల్లో శుభ్రం చేసి నిల్వ చేస్తే పుట్టగొడుగులను ఎక్కువ కాలం తాజాగా ఉంచుకోవచ్చు.
పుట్టగొడుగులు కొనుగోలు చేసే సమయంలో గట్టిగా, తాజాగా ఉన్నవాటినే ఎంపిక చేసుకోవాలి. ఇప్పటికే మెత్తబడినవి, నల్లటి మచ్చలు ఉన్నవి లేదా దుర్వాసన వచ్చే పుట్టగొడుగులను కొనకూడదు. చాలామంది అవి నీటిని పీల్చుకుంటాయని కడగడానికి భయపడుతుంటారు. కానీ పుట్టగొడుగులు మట్టి లేదా కంపోస్ట్లో పెరుగుతాయి కాబట్టి వాటిని శుభ్రం చేయడం తప్పనిసరి.
పుట్టగొడుగులను ఎప్పుడూ నీటిలో ఎక్కువసేపు నానబెట్టకూడదు. పారుతున్న నీటి కింద త్వరగా కడిగి, వెంటనే టిష్యూ పేపర్తో తుడిచి పొడిగా చేయాలి. అవసరమైతే పొడి పేపర్ టవల్ లేదా చిన్న బ్రష్తో వాటిపై ఉన్న మట్టిని సున్నితంగా తొలగించవచ్చు. ఇలా చేయడం వల్ల పుట్టగొడుగులు ఎక్కువ రోజులు తాజాగా ఉండి, వంటల్లో మంచి రుచిని అందిస్తాయి.
