మన ఇళ్లలో వంట నూనెను సాధారణంగా ఒకేసారి ఎక్కువగా కొనుగోలు చేసి నెలల తరబడి వాడుతూ ఉంటాం. అయితే నూనెను సరిగ్గా నిల్వ చేయకపోతే గాలిలోని ఆక్సిజన్, వంటగదిలోని వేడి, సూర్యరశ్మి ప్రభావంతో అది త్వరగా పాడైపోయే ప్రమాదం ఉందని నిపుణులు హెచ్చరిస్తున్నారు. నూనె పాలు లేదా బ్రెడ్లా వెంటనే పాడైపోయినట్లు కనిపించకపోయినా, కాలక్రమేణా ఆక్సీకరణం (Oxidation) అనే రసాయన చర్యకు గురవుతుంది.
నూనె ఆక్సీకరణం చెందినప్పుడు దాని రంగు, వాసన, రుచి మారిపోతాయి. ఇలాంటి పాడైపోయిన నూనెతో వంటలు చేయడం వల్ల ఆహారం రుచి దెబ్బతినడమే కాకుండా, ఆరోగ్యంపై కూడా ప్రతికూల ప్రభావం పడుతుంది. ముఖ్యంగా పాడైన నూనెను నిరంతరం తీసుకోవడం వల్ల శరీరంలో ఫ్రీ రాడికల్స్ పెరిగి కణాలను దెబ్బతీయడమే కాకుండా గుండె సంబంధిత సమస్యలకు దారితీసే అవకాశం ఉంది.
ప్రతి నూనె రకానికి నిల్వ కాలం వేర్వేరుగా ఉంటుంది. కెనోలా లేదా శుద్ధి చేసిన వెజిటబుల్ నూనె సీల్ తీసిన తర్వాత 6 నుండి 12 నెలల్లోపు వాడేయాలి. ఎక్స్ట్రా వర్జిన్ ఆలివ్ నూనెను 3 నుండి 6 నెలల్లోపు, నువ్వుల నూనె మరియు అవకాడో నూనెలను 6 నెలల్లోపు వాడటం మంచిది. కొబ్బరి నూనె రెండేళ్ల వరకు నిల్వ ఉండగా, అవిసె గింజల నూనెను సీల్ తెరిచిన తర్వాత తప్పనిసరిగా ఫ్రిజ్లో ఉంచాలని నిపుణులు సూచిస్తున్నారు.
