మనదేశంలో ఉదయం లేవగానే వేడివేడిగా ఒక కప్పు టీ తాగడం చాలా మందికి అలవాటు. అలసటను దూరం చేసుకోవడానికి, కాస్త ప్రశాంతత కోసం రోజులో నాలుగైదు సార్లు టీ తాగే వారు కూడా ఉన్నారు. అయితే, పరిమితికి మించి అతిగా టీ తాగడం వల్ల శరీరానికి అనేక ఆరోగ్య సమస్యలు ముప్పు పొంచి ఉందని వైద్యులు హెచ్చరిస్తున్నారు. టీలో ఉండే కెఫీన్ అనే పదార్థం శరీరంలో ఎక్కువగా చేరడం వల్ల అది మన ఆరోగ్యాన్ని తీవ్రంగా దెబ్బతీస్తుందని స్పష్టం చేస్తున్నారు.
ముఖ్యంగా, అతిగా టీ తాగడం వల్ల వచ్చే ప్రధాన సమస్యల్లో ‘నిద్రలేమి’ (Insomnia) ఒకటి. టీలో ఉండే కెఫీన్ మెదడును నిరంతరం ఉత్తేజితంగా ఉంచడం వల్ల రాత్రి పూట సరైన నిద్ర పట్టదు. దీనితో పాటు, టీ శరీరంలో ఐరన్ (ఇనుము) శోషణను అడ్డుకుంటుంది. దీనివల్ల రక్తంలో హిమోగ్లోబిన్ శాతం తగ్గి ‘రక్తహీనత’ (Anemia) బారిన పడే ప్రమాదం ఉంది. తరచూ అలసటగా అనిపించడం, జ్ఞాపకశక్తి తగ్గడం వంటి సమస్యలు కూడా దీనివల్ల ఎదురవుతాయి.
ఇవే కాకుండా, ఖాళీ కడుపుతో లేదా అతిగా టీ తాగడం వల్ల జీర్ణవ్యవస్థ తీవ్రంగా ప్రభావితమవుతుంది. ఇది కడుపులో గ్యాస్, ఎసిడిటీ, మంట మరియు మలబద్ధకానికి దారితీస్తుంది. కొంతమందిలో ఇది ఆందోళన (Anxiety), గుండె వేగంగా కొట్టుకోవడం, మరియు రక్తపోటు (Blood Pressure) పెరగడానికి కారణమవుతుంది. అందుకే రోజుకు రెండు కప్పుల కంటే ఎక్కువ టీ తాగకుండా ఉండటమే ఆరోగ్యానికి శ్రేయస్కరమని నిపుణులు సూచిస్తున్నారు.
