అంతర్జాతీయ రాజకీయాల్లో తీవ్ర కలకలం రేపుతూ అమెరికా అధ్యక్షుడు డొనాల్డ్ ట్రంప్ ఇరాన్ను ఉద్దేశించి అత్యంత సంచలన ప్రకటన చేశారు. ఈ రాత్రికే ఇరాన్పై మిలిటరీ దాడి జరిపి, ఆ దేశానికి వ్యూహాత్మకంగా ఎంతో కీలకమైన “ఖర్గ్ ద్వీపాన్ని” (Kharg Island) స్వాధీనం చేసుకుంటామని ఆయన హెచ్చరించారు. గతంలో వెనిజులా విషయంలో అనుసరించిన వ్యూహాల మాదిరిగానే ఇరాన్ చమురు ఎగుమతులకు గుండెకాయ లాంటి ఈ ద్వీపాన్ని తమ ఆధీనంలోకి తీసుకుంటామని ట్రంప్ చేసిన వ్యాఖ్యలు ప్రపంచవ్యాప్తంగా తీవ్ర ఉద్రిక్తతలకు దారితీశాయి.
పశ్చిమాసియా (మిడిల్ ఈస్ట్) ప్రాంతంలో ఇరాన్ అనుసరిస్తున్న దూకుడు వైఖరికి మరియు అంతర్జాతీయ జలాల్లో జరుగుతున్న దాడులకు చెక్ పెట్టడమే లక్ష్యంగా అమెరికా ఈ కఠిన నిర్ణయానికి వచ్చినట్లు తెలుస్తోంది. ఇరాన్ ముడి చమురు ఎగుమతుల్లో దాదాపు 90 శాతానికి పైగా ఈ ఖర్గ్ ద్వీపంలోని టెర్మినల్స్ ద్వారానే జరుగుతుంటాయి. అటువంటి కీలకమైన ఆర్థిక, వ్యూహాత్మక కేంద్రాన్ని లక్ష్యంగా చేసుకుని ట్రంప్ నేరుగా దాడి ప్రకటన చేయడంతో, ఇరు దేశాల మధ్య యుద్ధ మేఘాలు కమ్ముకున్నట్లయింది.
ట్రంప్ చేసిన ఈ ఘాటు ప్రకటనతో అంతర్జాతీయ చమురు మార్కెట్ ఒక్కసారిగా కుదేలైంది. కంటిన్యూగా పెరుగుతున్న ఉద్రిక్తతల నేపథ్యంలో ముడి చమురు (Crude Oil) ధరలు భారీగా పెరిగే అవకాశం ఉందని మార్కెట్ నిపుణులు ఆందోళన వ్యక్తం చేస్తున్నారు. మరోవైపు అమెరికా హెచ్చరికలపై ఇరాన్ సైన్యం కూడా హై అలర్ట్ అయింది. ఒకవేళ అమెరికా గనుక తమ సార్వభౌమాధికారానికి భంగం కలిగిస్తే ఊహించని స్థాయిలో ప్రతీకారం తీర్చుకుంటామని ఇరాన్ పాలకులు ప్రతిసవాల్ విసురుతున్నారు.
