వై 7 న్యూస్ ; తెలంగాణ రాష్ట్ర ముఖ్యమంత్రి A. Revanth Reddy కేంద్ర ఉక్కు మరియు హెవీ ఇండస్ట్రీస్ మంత్రి H. D. Kumaraswamy ను కలిసి బయ్యారం ప్రాంతంలో గ్రీన్ స్టీల్ ప్లాంట్ ఏర్పాటు చేయాలని విజ్ఞప్తి చేశారు. ఈ ప్రాజెక్ట్ ద్వారా ఉక్కు కొరత తగ్గడంతో పాటు పర్యావరణానికి మేలు జరుగుతుందని ఆయన పేర్కొన్నారు.
శనివారం ఉదయం ఢిల్లీలో జరిగిన ఈ సమావేశంలో కేంద్ర ఉక్కు శాఖ సహాయ మంత్రి Bhupathiraju Srinivasa Varma కూడా పాల్గొన్నారు. ఈ సందర్భంగా “తెలంగాణ రైజింగ్–2047 విజన్”లో భాగంగా రూపొందించిన పారిశ్రామిక ప్రతిపాదనలను సీఎం సమర్పించారు.
పాత వాహనాల నుంచి వచ్చే స్క్రాప్ను ఉపయోగించి తెలంగాణలో స్టీల్ రీసైక్లింగ్ పరిశ్రమను ఏర్పాటు చేయాలని సీఎం కోరారు. ఇప్పటికే ఉన్న సాంకేతిక వనరులు, పెద్ద స్థాయి పరిశ్రమలు, అనుకూల వాతావరణంతో Hyderabad దేశ పారిశ్రామిక ఉత్పత్తిలో కీలక కేంద్రంగా ఎదగగలదని వివరించారు.
హైదరాబాద్లో హైడ్రోజన్ ఆధారిత గ్రీన్ స్టీల్ క్లస్టర్తో పాటు ఆటోమొబైల్, డిఫెన్స్ రంగాలకు సంబంధించిన తయారీ యూనిట్లు ఏర్పాటు చేయాలని ప్రతిపాదించారు. ఎలక్ట్రిక్ వాహనాల డిమాండ్ పెరుగుతున్న నేపథ్యంలో ఈవీ బ్యాటరీ తయారీ హబ్ను కూడా ఏర్పాటు చేయాలని సూచించారు.
అధునాతన తయారీ రంగానికి సంబంధించిన మెషిన్ టూల్స్, రోబోటిక్స్ కోసం ప్రత్యేక పార్క్ ఏర్పాటు చేయాలని, 2034 నాటికి హైదరాబాద్ను కాలుష్య రహిత నగరంగా తీర్చిదిద్దే లక్ష్యంతో ఎలక్ట్రిక్ వాహనాల వినియోగాన్ని ప్రోత్సహించేందుకు కేంద్రం సహకారం అందించాలని కోరారు.
అదేవిధంగా ఆధునిక పరిశ్రమలకు అవసరమైన నైపుణ్యాలను అందించేందుకు హైదరాబాద్లో జాతీయ స్థాయి స్కిల్ డెవలప్మెంట్ సంస్థలను ఏర్పాటు చేయాలని సీఎం సూచించారు.
ఈ సమావేశంలో ప్రధాన కార్యదర్శి శ్రీనివాస్ రాజు, కేంద్ర ప్రాజెక్టుల సమన్వయ ప్రత్యేక కార్యదర్శి అద్వైత్ కుమార్ సింగ్ పాల్గొన్నారు.
