తమిళనాడులో కొత్తగా ఏర్పడిన తమిళగ వెట్రి కజగం (TVK) ప్రభుత్వం జూన్ 16న రాష్ట్ర ఆర్థిక స్థితిగతులపై విడుదల చేసిన శ్వేతపత్రంపై మాజీ ఐపీఎస్, ‘వుయ్ ది లీడర్’ వ్యవస్థాపకుడు కె. అన్నామలై స్పందించారు. రాష్ట్రం ఎదుర్కొంటున్న తీవ్ర ఆర్థిక సంక్షోభం నుంచి గట్టెక్కేందుకు వీలుగా ఆర్థికవేత్తలు, విద్యావేత్తలు మరియు వివిధ రంగాల నిపుణులతో కూడిన ఒక ఉన్నతస్థాయి ‘సంప్రదింపుల బృందాన్ని’ (Functional Consultation Group) ఏర్పాటు చేయాలని ఆయన ముఖ్యమంత్రి జోసెఫ్ విజయ్కు కీలక సలహా ఇచ్చారు.
ముఖ్యమంత్రి విజయ్ విడుదల చేసిన శ్వేతపత్రం ప్రకారం, తమిళనాడు ప్రత్యక్ష అప్పులు దాదాపు రూ.10 లక్షల కోట్లకు చేరుకోగా, ప్రభుత్వ రంగ సంస్థల (PSUs) బకాయిలను కూడా కలుపుకుంటే మొత్తం అప్పుల భారం రూ.13.18 లక్షల కోట్లుగా తేలింది. దీనిపై స్పందించిన అన్నామలై.. రూ.10 లక్షల కోట్ల రుణం జనాభా నిష్పత్తి ప్రకారం ఒక్కొక్కరిపై రూ.1,28,934 అప్పుగా ఉందని లెక్కలు చెప్పారు. వ్యవస్థాగత అవినీతి, రియల్ ఎస్టేట్ ధరలను తక్కువగా చూపించడం వల్ల రిజిస్ట్రేషన్ రాబడులు తగ్గడం వంటి అనేక కారణాల వల్ల రాబడి పడిపోయిందని, గత ఐదేళ్ల డీఎంకే పాలనలో జరిగిన ఆర్థిక దుర్వినియోగానికి ఈ శ్వేతపత్రం ఒక ‘పోస్ట్మార్టమ్’ లాంటిదని అభిప్రాయపడ్డారు.
ఈ నివేదికను సాకుగా చూపి రాబోయే రోజుల్లో ప్రభుత్వం తమ బాధ్యతల నుంచి తప్పుకోకూడదని, తక్షణ దిద్దుబాటు చర్యలకు దీనిని ఒక మార్గసూచిగా (Roadmap) పరిగణించాలని అన్నామలై హితవు పలికారు. 2031 నాటికి రాష్ట్రంలో పనిచేసే వయసున్న జనాభా క్రమంగా తగ్గిపోనుందని హెచ్చరించిన ఆయన, ఆదాయ వనరులను పెంచుకుని అప్పుల భారాన్ని తగ్గించుకోవడానికి కొత్త ప్రభుత్వానికి చాలా తక్కువ సమయం ఉందన్నారు. ఇదే సమయంలో కాంచీపురం జిల్లా ప్రభుత్వ పాఠశాలలో టీవీకే కార్యకర్తలు క్లాస్రూమ్లోకి చొరబడి సీఎం విజయ్ ఫోటో తగిలిస్తూ సోషల్ మీడియా రీల్స్ చేసిన ఉదంతాన్ని అన్నామలై తీవ్రంగా ఖండిస్తూ, ఇలాంటి క్రమశిక్షణారాహిత్య చర్యలకు కార్యకర్తలను దూరంగా ఉంచాలని సీఎం విజయ్ మరియు విద్యాశాఖ మంత్రి రాజ్మోహన్లను కోరారు.
