కృత్రిమ మేధ (ఏఐ) నియంత్రణ దిశగా కేంద్ర ప్రభుత్వం కీలక అడుగులు వేస్తోంది. ఏఐ భద్రత, డీప్‌ఫేక్‌ల కట్టడి, మానవ కేంద్రిత విధానం వంటి అంశాలపై దృష్టి సారిస్తూ, నెల రోజుల్లోగా ఒక సంప్రదింపుల పత్రం తీసుకురానున్నట్లు కేంద్ర ఐటీ, కమ్యూనికేషన్ల శాఖ మంత్రి అశ్విని వైష్ణవ్ వెల్లడించారు. ఈ పత్రం ఆధారంగానే భవిష్యత్తులో ఏఐ నియంత్రణ నిబంధనలను రూపొందించనున్నట్లు ఆయన స్పష్టం చేశారు.
ప్రపంచ అభివృద్ధి నివేదిక విడుదల కార్యక్రమంలో గురువారం ఆయన మాట్లాడారు. ఏఐ నియంత్రణకు సమయం ఆసన్నమైందని, ఈ టెక్నాలజీని ఎలా నియంత్రించాలనే దానిపై అభిప్రాయాలు సేకరించేందుకే ఈ సంప్రదింపుల పత్రం విడుదల చేస్తున్నట్లు తెలిపారు. “ఏఐ వినియోగానికి సంబంధించిన భద్రత అత్యంత ముఖ్యమైన అంశం. దీనిపై దృష్టి సారించేలా ఒక నియంత్రణ-కేంద్రీకృత సంప్రదింపుల పత్రం తీసుకురావాలని నేను విభాగాన్ని కోరుతున్నాను” అని వైష్ణవ్ పేర్కొన్నారు.
డీప్‌ఫేక్‌లు సమాజంలో పెను సంక్షోభాన్ని సృష్టించగల ఒక పీడ అని వైష్ణవ్ అభివర్ణించారు. వాటి సామర్థ్యం రోజురోజుకు మెరుగవుతోందని, ప్రజలు వాటిని సులభంగా నమ్మి తప్పుడు మార్గాల్లోకి వెళుతున్నారని ఆందోళన వ్యక్తం చేశారు. డీప్‌ఫేక్‌ల వల్ల సమాజంలో తప్పుడు అభిప్రాయాలు, కథనాలు ప్రచారంలోకి వస్తాయని ఆయన హెచ్చరించారు.
ప్రతిపాదిత నియంత్రణ ఫ్రేమ్‌వర్క్‌లో నైపుణ్యాభివృద్ధి, భద్రత, టెక్నాలజీ అభివృద్ధిలో ఎవరూ వెనుకబడకుండా చూడటం వంటి అంశాలు కూడా ఉంటాయని మంత్రి స్పష్టం చేశారు. ఏ మార్పు వచ్చినా అందులో మానవాళి ప్రయోజనాలకే పెద్దపీట వేయాలని, నియంత్రణ విధానంలో ఇదే కేంద్ర బిందువుగా ఉండాలని ఆయన అన్నారు. ఏఐని కేవలం చట్టాల ద్వారా మాత్రమే నియంత్రించలేమని, సాంకేతికత, చట్టం కలగలిసిన ‘టెక్నో-లీగల్’ పరిష్కారం అవసరమని వైష్ణవ్ అభిప్రాయపడ్డారు. సైబర్‌ సెక్యూరిటీ, యూజర్ హార్మ్, డీప్‌ఫేక్‌ల వంటి ప్రమాదాలను ఎదుర్కోవడంలో సంస్థలదే ప్రాథమిక బాధ్యత అని ఆయన స్పష్టం చేశారు.
“ఈ సంప్రదింపుల పత్రం ద్వారా వచ్చిన ఫీడ్‌బ్యాక్ ఆధారంగా నియంత్రణ ఫ్రేమ్‌వర్క్‌ను రూపొందిస్తాం. నెల రోజుల్లో ఈ పత్రం విడుదల చేస్తాం. దాని ఆధారంగా నియంత్రణ ప్రక్రియలో ముందుకు వెళతాం” అని అశ్విని వైష్ణవ్ వివరించారు.
