పశ్చిమాసియాలో కొనసాగుతున్న ఉద్రిక్తతల నేపథ్యంలో సౌదీ అరేబియాలోని పవిత్ర నగరం మక్కా సమీపంలో డ్రోన్ ఘటన చోటుచేసుకుంది. మక్కా నగరానికి సమీపంలోని నిషేధిత గగనతలంలోకి ఓ డ్రోన్ ప్రవేశించేందుకు ప్రయత్నించగా.. సౌదీ అరేబియా రాయల్ ఎయిర్ డిఫెన్స్ బలగాలు దానిని అడ్డుకుని కూల్చివేసినట్లు అధికారులు వెల్లడించారు.
సౌదీ నేతృత్వంలోని కూటమి ప్రతినిధి తుర్కి అల్-మాలికి తెలిపిన వివరాల ప్రకారం.. మంగళవారం సాయంత్రం డ్రోన్ మక్కా సమీపంలోని నిషేధిత గగనతలంలోకి ప్రవేశించేందుకు ప్రయత్నించింది. అయితే సౌదీ వైమానిక రక్షణ వ్యవస్థ దానిని గుర్తించి, మక్కా నగరానికి చేరకముందే అడ్డుకుని నిర్వీర్యం చేసింది.
ఈ ఘటన అనంతరం మక్కా, జెడ్డా, తైఫ్ నగరాల్లో భద్రతా అప్రమత్తతను పెంచారు. డ్రోన్ ఘటనలో ఎలాంటి ప్రాణనష్టం జరిగినట్లు సమాచారం లేదని అధికారులు తెలిపారు. పశ్చిమాసియాలో ఉద్రిక్తతలు కొనసాగుతున్న నేపథ్యంలో పవిత్ర ప్రాంతాల భద్రతపై సౌదీ అధికారులు మరింత అప్రమత్తంగా వ్యవహరిస్తున్నారు.
