యెమెన్లో హౌతీలు, అంతర్జాతీయంగా గుర్తింపు పొందిన ప్రభుత్వానికి మద్దతుగా ఉన్న బలగాల మధ్య ఘర్షణలు తీవ్రతరం కావడంతో లక్ష మందికి పైగా ప్రజలు ఇళ్లను వదిలి నిరాశ్రయులయ్యారు. ముఖ్యంగా పశ్చిమ తీర ప్రాంతంలో పరిస్థితులు వేగంగా మారుతున్నాయని, హింస కారణంగా సామాన్య ప్రజలు తీవ్ర ఇబ్బందులు ఎదుర్కొంటున్నారని ఐక్యరాజ్యసమితి హెచ్చరించింది.
ఐరాస శరణార్థుల సంస్థ మంగళవారం విడుదల చేసిన ప్రకటన ప్రకారం.. యెమెన్ పశ్చిమ తీరంలో ఇటీవల ఘర్షణలు ఒక్కసారిగా ఉద్ధృతమయ్యాయి. దీంతో దేశంలోనే 1,00,000 మందికి పైగా ప్రజలు వలస వెళ్లాల్సి వచ్చింది. ఇళ్లను వదిలిన ప్రజలు సురక్షిత ప్రాంతాల కోసం తీవ్ర ఇబ్బందులు ఎదుర్కొంటున్నారు.
మరోవైపు హింస నుంచి తప్పించుకునేందుకు వేలాది మంది ప్రాణాలను పణంగా పెట్టి సముద్ర మార్గంలో జిబౌటీకి చేరుకునేందుకు ప్రయత్నిస్తున్నారు. బాబ్ అల్-మందెబ్ జలసంధిని దాటి సురక్షిత ప్రాంతాలకు వెళ్లేందుకు వారు ప్రయత్నిస్తున్నట్లు ఐరాస తెలిపింది. వేగంగా మారుతున్న పరిస్థితుల నేపథ్యంలో పౌరుల రక్షణకు తక్షణ చర్యలు అవసరమని ఐరాస సంస్థలు సూచిస్తున్నాయి.
