ముఖ్యమంత్రి చంద్రబాబు నాయుడు చిత్తూరులో నిర్వహించిన కార్యక్రమంలో ప్రతిపక్ష వైసీపీపై తీవ్ర విమర్శలు చేశారు. అమరావతి రాజధానికి బదులుగా “మావిగన్” వంటి ప్రతిపాదనలు చేస్తున్నారని ఆరోపిస్తూ, ప్రజలు అమరావతిని కోరుకుంటుంటే ప్రతిపక్షం భిన్నమైన ప్రచారం చేస్తోందని వ్యాఖ్యానించారు. ప్రజల విషయంలో తాను సౌమ్యంగా ఉంటానని, అయితే సంఘ విద్రోహ శక్తుల విషయంలో మాత్రం కఠినంగా వ్యవహరిస్తానని స్పష్టం చేశారు. అలాగే రాజధాని విషయంలో కేంద్రం చట్టం చేసిన తర్వాత దానిని మార్చడం సాధ్యం కాదని పేర్కొన్నారు.
రాయలసీమ అభివృద్ధిపై మాట్లాడిన సీఎం, ఫ్యాక్షన్ రాజకీయాలకు కాలం చెల్లిపోయిందని, ఇప్పుడు సీమ అభివృద్ధి దిశగా అడుగులు వేస్తోందన్నారు. వివేకానంద రెడ్డి హత్య కేసు, కోడికత్తి ఘటన వంటి అంశాలను ప్రస్తావిస్తూ గత ప్రభుత్వంపై విమర్శలు చేశారు. రౌడీయిజానికి రాజకీయాల్లో స్థానం ఉండకూడదని, శాంతిభద్రతల పరిరక్షణకు ప్రభుత్వం కట్టుబడి ఉందని తెలిపారు.
కుప్పం అభివృద్ధికి ప్రభుత్వం ప్రత్యేక ప్రణాళికతో ముందుకు వెళ్తోందని చంద్రబాబు వెల్లడించారు. జొన్నగిరిలో గోల్డ్ ఫీల్డ్స్ ప్రారంభించినట్లు గుర్తు చేస్తూ, కుప్పం పరిసర ప్రాంతాల్లో ఉన్న బంగారు ఖనిజాలపై కూడా అధ్యయనం చేపడతామని చెప్పారు. టీటీడీ నిధులతో దేవాలయాల అభివృద్ధి, ఎలిఫెంట్ సఫారీ, రాక్ క్లైంబింగ్, ట్రెక్కింగ్ వంటి పర్యాటక ప్రాజెక్టులను అభివృద్ధి చేయనున్నట్లు తెలిపారు. అలాగే సుర్బానా జురాంగ్, ఐఐటీ కాన్పూర్ సహకారంతో కుప్పం అభివృద్ధికి సమగ్ర మాస్టర్ ప్లాన్ సిద్ధం చేస్తున్నట్లు వెల్లడించారు.
