కాంగ్రెస్ అగ్రనేత, లోక్సభలో ప్రతిపక్ష నేత రాహుల్ గాంధీకి సుప్రీంకోర్టులో మధ్యంతర ఊరట లభించింది. ఆదాయానికి మించిన ఆస్తుల ఆరోపణలకు సంబంధించిన కేసులో ప్రస్తుతం ఎలాంటి తదుపరి చర్యలు తీసుకోవద్దని అలహాబాద్ హైకోర్టును సుప్రీంకోర్టు ఆదేశించింది. దీంతో ఈ కేసులో రాహుల్ గాంధీకి తాత్కాలిక ఉపశమనం లభించినట్లైంది.
ఇదే సమయంలో ఈ కేసుకు సంబంధించి కేంద్ర దర్యాప్తు సంస్థలు CBI, EDపై కూడా సుప్రీంకోర్టు కీలక ఆదేశాలు జారీ చేసింది. అలహాబాద్ హైకోర్టు గతంలో ఇచ్చిన ఆదేశాల మేరకు ఎలాంటి నివేదికను సమర్పించవద్దని స్పష్టం చేసింది. తదుపరి విచారణలో కేసుకు సంబంధించిన అంశాలను పరిశీలించిన అనంతరం కోర్టు మరిన్ని ఆదేశాలు ఇచ్చే అవకాశం ఉంది.
రాహుల్ గాంధీపై ఆదాయానికి మించిన ఆస్తులు కలిగి ఉన్నారనే ఆరోపణల నేపథ్యంలో ఈ వ్యవహారం న్యాయస్థానాల దృష్టికి వెళ్లింది. తాజాగా సుప్రీంకోర్టు ఇచ్చిన మధ్యంతర ఆదేశాలతో ఈ కేసులో తదుపరి పరిణామాలపై రాజకీయ, న్యాయ వర్గాల్లో ఆసక్తి నెలకొంది. కేసు విచారణ కొనసాగుతున్నందున ఆరోపణలపై తుది నిర్ణయం వెలువడాల్సి ఉంది.
