అమెరికా అధ్యక్షుడు డొనాల్డ్ ట్రంప్ దక్షిణ కొరియాతో నిర్వహించే సంయుక్త సైనిక విన్యాసాలపై కీలక నిర్ణయం తీసుకున్నారు. ఈ విన్యాసాలను తగ్గించాలని పెంటగాన్ను ఆదేశించినట్లు ట్రంప్ వెల్లడించారు. ఉత్తర కొరియా అధినేత కిమ్ జోంగ్ ఉన్తో తనకు మంచి సంబంధాలు ఉన్నాయని పేర్కొంటూ ఈ నిర్ణయాన్ని ఆయన సమర్థించారు.
ఆదివారం ‘ట్రూత్ సోషల్’లో చేసిన పోస్టులో ట్రంప్ ఈ విషయాన్ని వెల్లడించారు. ఆగస్టు 17 నుంచి ప్రారంభం కానున్న ‘ఉల్చి ఫ్రీడమ్ షీల్డ్’ సైనిక విన్యాసాలను పూర్తిగా రద్దు చేయడం ప్రస్తుతం సాధ్యం కాదని ఆయన పేర్కొన్నారు. అయితే ఈ విన్యాసాల్లో అమెరికా పాల్గొనేందుకు అంగీకరించడమే తనకు అసంతృప్తి కలిగించిందని తెలిపారు.
ఉత్తర కొరియాతో సంబంధాల విషయంలో తాను గతంలో అనుసరించిన విధానాన్ని ప్రస్తావిస్తూ ట్రంప్ తాజా నిర్ణయం తీసుకున్నట్లు తెలుస్తోంది. అమెరికా-దక్షిణ కొరియా మధ్య సంయుక్త సైనిక విన్యాసాలు ఉత్తర కొరియాకు చాలాకాలంగా ఆగ్రహం కలిగిస్తున్న అంశాల్లో ఒకటి. ఈ నేపథ్యంలో ట్రంప్ ఆదేశాలు కొరియా ద్వీపకల్పంలో భద్రతా పరిణామాలపై ఆసక్తిని పెంచాయి.
