పత్తి రైతులు నాణ్యతా ప్రమాణాలు పాటించాలి

8–12 శాతం తేమకు అనుగుణంగా పత్తిని సిద్ధం చేసుకోవాలి: కలెక్టర్ దివాకర టీఎస్

ఖమ్మం: 2026–27 ఖరీఫ్ మార్కెటింగ్ సీజన్‌లో కాటన్ కార్పొరేషన్ ఆఫ్ ఇండియా (CCI) ద్వారా కనీస మద్దతు ధరకు పత్తిని విక్రయించాలనుకునే రైతులు నాణ్యతా ప్రమాణాలను పాటించాలని ఖమ్మం జిల్లా కలెక్టర్ దివాకర టీఎస్ సూచించారు.

పత్తి కొనుగోళ్ల సమయంలో రైతులకు ఎలాంటి ఇబ్బందులు తలెత్తకుండా అవసరమైన ఏర్పాట్లు పూర్తి చేయాలని అధికారులను ఆదేశించారు.

జిల్లాలో 8 కొనుగోలు కేంద్రాలు

ఖమ్మం జిల్లాలో పత్తి కొనుగోళ్ల కోసం 8 జిన్నింగ్ మిల్లులను కొనుగోలు కేంద్రాలుగా నోటిఫై చేసినట్లు కలెక్టర్ తెలిపారు. ఖమ్మం, మద్దులపల్లి, మధిర, వైరా ప్రాంతాల్లోని నోటిఫైడ్ జిన్నింగ్ మిల్లుల్లో కొనుగోలు ఏర్పాట్లు చేయాలని అధికారులను ఆదేశించారు.

రైతులు పత్తిని తీసుకువచ్చే ముందు తమకు కేటాయించిన కొనుగోలు కేంద్రం, జిన్నింగ్ మిల్లు వివరాలను తెలుసుకోవాలని సూచించారు. నోటిఫై చేసిన కేంద్రాల్లోనే పత్తిని విక్రయించి కనీస మద్దతు ధర ప్రయోజనం పొందాలని తెలిపారు.

తేమ శాతాన్ని ముందుగానే పరీక్షించుకోవాలి

పత్తిలో తేమ శాతం నాణ్యతతో పాటు ధరపై ప్రభావం చూపుతుందని కలెక్టర్ తెలిపారు. జిల్లాలోని 129 రైతు వేదికల్లో మాయిశ్చర్ మీటర్ల ద్వారా పత్తిలో తేమ శాతాన్ని పరీక్షించుకునే అవకాశం కల్పించినట్లు చెప్పారు.

రైతులు పత్తిని సాధ్యమైనంత వరకు 8 శాతం లోపు తేమ ఉండేలా ఆరబెట్టి మార్కెట్‌కు తీసుకురావాలని సూచించారు. 8 శాతానికి మించి తేమ ఉంటే ప్రతి అదనపు ఒక్క శాతం తేమకు రూ.86.67 చొప్పున ధరలో తగ్గింపు ఉంటుందని అధికారులు తెలిపారు.

కౌలు రైతులు ముందుగానే రిజిస్ట్రేషన్ చేసుకోవాలి

కౌలు రైతులు CCI ద్వారా కనీస మద్దతు ధరకు పత్తిని విక్రయించేందుకు అవసరమైన తాత్కాలిక రిజిస్ట్రేషన్ (Temporary Registry) ప్రక్రియను ముందుగానే పూర్తి చేసుకోవాలని కలెక్టర్ సూచించారు.

సమీపంలోని వ్యవసాయ విస్తరణ అధికారి, మండల వ్యవసాయ అధికారి లేదా జిల్లా వ్యవసాయ అధికారి కార్యాలయాన్ని సంప్రదించి రిజిస్ట్రేషన్‌కు సంబంధించిన వివరాలను నమోదు చేసుకోవాలని తెలిపారు.

ఆధార్ ధృవీకరణ తప్పనిసరి

CCI ద్వారా పత్తి విక్రయించే సమయంలో రైతులు ఆధార్ ధృవీకరణ చేయించుకోవాల్సి ఉంటుందని కలెక్టర్ తెలిపారు. బయోమెట్రిక్ ద్వారా ధృవీకరణ చేయించుకోవచ్చు. వేలిముద్రలు సరిపోని సందర్భాల్లో ఐరిస్ స్కాన్, ముఖ ధృవీకరణ లేదా OTP ద్వారా కూడా ఆధార్ ఆథెంటికేషన్ చేసుకునే అవకాశం ఉందని అధికారులు తెలిపారు.

OTP విధానం కోసం ఆధార్‌కు మొబైల్ నంబర్ అనుసంధానం అయి ఉండాలని సూచించారు.

‘కపాస్ కిసాన్’ యాప్‌తో స్లాట్ బుకింగ్

పత్తి విక్రయాల కోసం రైతులు ‘కపాస్ కిసాన్’ మొబైల్ యాప్ను వినియోగించుకోవాలని కలెక్టర్ సూచించారు. మొబైల్ నంబర్, OTP ద్వారా యాప్‌లో లాగిన్ అయి CCIకి పత్తి విక్రయించేందుకు స్లాట్ బుక్ చేసుకోవచ్చని తెలిపారు.

ఈ యాప్ ద్వారా కొనుగోలు కేంద్రాల వివరాలు, పత్తి విక్రయ వివరాలు, తక్పట్టి, చెల్లింపులకు సంబంధించిన సమాచారాన్ని తెలుసుకోవచ్చని అధికారులు తెలిపారు.

రైతుల సందేహాల నివృత్తికి వాట్సాప్ హెల్ప్‌లైన్: 8897281111, ‘కపాస్ కిసాన్’ యాప్ టోల్‌ఫ్రీ నంబర్: 18005995779ను సంప్రదించాలని సూచించారు.

చివరి సమయంలో ఇబ్బందులు లేకుండా జాగ్రత్తలు

రైతులు పత్తిని మార్కెట్‌కు తీసుకువచ్చే ముందు తేమ శాతాన్ని పరీక్షించుకోవడం, అవసరమైన రిజిస్ట్రేషన్ పూర్తి చేసుకోవడం, ఆధార్ ధృవీకరణకు అవసరమైన పత్రాలను సిద్ధంగా ఉంచుకోవడం, తమకు సంబంధించిన జిన్నింగ్ మిల్లు/కొనుగోలు కేంద్రం వివరాలను తెలుసుకోవడం వంటి జాగ్రత్తలు తీసుకోవాలని కలెక్టర్ సూచించారు.

పత్తి కొనుగోలు ప్రక్రియలో రైతులకు ఎలాంటి ఇబ్బందులు కలగకుండా వ్యవసాయ, మార్కెటింగ్ శాఖల అధికారులు సమన్వయంతో పనిచేయాలని ఆదేశించారు.