విక్టరీ వెంకటేశ్‌, మాటల మాంత్రికుడు త్రివిక్రమ్ శ్రీనివాస్ కలయికలో వస్తున్న ‘ఆదర్శ కుటుంబం’ చిత్రంపై ప్రేక్షకుల్లో భారీ అంచనాలు నెలకొన్నాయి. ఈ క్రేజీ కాంబినేషన్‌పై ఉన్న ఆసక్తిని మరింత పెంచుతూ చిత్రబృందం వరుస అప్‌డేట్స్‌తో ముందుకొస్తోంది. సినిమా విడుదల తేదీ అక్టోబర్ 9 సమీపిస్తుండటంతో ప్రమోషన్ల వేగాన్ని పెంచింది. తాజాగా నిర్మాత నాగవంశీ ఈ సినిమా ట్రైలర్ విడుదల, టికెట్ బుకింగ్స్‌కు సంబంధించిన కీలక వివరాలను వెల్లడించారు.
నాగవంశీ తెలిపిన వివరాల ప్రకారం.. ‘ఆదర్శ కుటుంబం’ థియేట్రికల్ ట్రైలర్‌ను అక్టోబర్ 6వ తేదీన విడుదల చేయనున్నారు. ఇప్పటివరకు విడుదలైన పోస్టర్లు, గ్లింప్స్‌తో సినిమాపై అంచనాలు పెరగ్గా, ట్రైలర్‌తో కథాంశం, పాత్రల తీరుతెన్నులపై పూర్తి స్పష్టత రానుంది. ముఖ్యంగా తొలిసారి వెంకటేశ్‌ను త్రివిక్రమ్ ఎలా చూపించబోతున్నారనే ఆసక్తి అభిమానుల్లో నెలకొంది.
ట్రైలర్ విడుదలైన మరుసటి రోజే, అంటే అక్టోబర్ 7 నుంచి తెలుగు రాష్ట్రాల్లో టికెట్ బుకింగ్స్‌ను ప్రారంభించనున్నట్లు ఆయన తెలిపారు. దీంతో అభిమానులు, ప్రేక్షకులు సినిమా విడుదలకు రెండు రోజుల ముందే తమ టికెట్లను రిజర్వ్ చేసుకునే అవకాశం కలుగుతుంది.
ఈ సందర్భంగా నాగవంశీ మాట్లాడుతూ.. ‘ఆదర్శ కుటుంబం’ ఒక సంపూర్ణ కుటుంబ కథా చిత్రమని, కామెడీ, యాక్షన్, భావోద్వేగాల కలబోతగా ఉంటుందని ధీమా వ్యక్తం చేశారు. “పిల్లల పరీక్షలు పూర్తయ్యాక, కుటుంబమంతా కలిసి థియేటర్‌కు వచ్చి హాయిగా నవ్వుకునే సినిమా ఇది. ప్రతి ఒక్కరూ ఈ చిత్రాన్ని ఆస్వాదిస్తారు” అని ఆయన పేర్కొన్నారు.
త్రివిక్రమ్ మార్క్ సంభాషణలు, ఆయన శైలి మేకింగ్‌కు వెంకటేశ్‌ ఎనర్జీ, టైమింగ్ తోడైతే వినోదం ఏ స్థాయిలో ఉంటుందోనని ప్రేక్షకులు ఆసక్తిగా ఎదురుచూస్తున్నారు.
ఈ చిత్రంలో వెంకటేశ్‌ సరసన ‘కేజీఎఫ్’ ఫేమ్ శ్రీనిధి శెట్టి హీరోయిన్‌గా నటిస్తుండగా, నివేదా పేతురాజ్, నారా రోహిత్, పూజిత పొన్నాడ, రావు రమేశ్‌, సత్య, యువినా పార్తవి వంటి ప్రముఖ నటులు కీలక పాత్రలు పోషిస్తున్నారు. అక్టోబర్ 9న థియేటర్లలోకి రానున్న ఈ సినిమాపై తాజా అప్‌డేట్స్‌తో అంచనాలు మరింతగా పెరిగాయి.
