జమ్మూకశ్మీర్‌లో భద్రతా దళాలు భారీ విజయాన్ని నమోదు చేశాయి. లష్కరే తోయిబా (ఎల్‌ఈటీ) సంస్థకు చెందిన సీనియర్ కమాండర్ మూసా అలియాస్ ఆసిఫ్ ఫౌజీని మంగళవారం బుద్గాం జిల్లాలో జరిగిన ఎన్‌కౌంటర్‌లో మట్టుబెట్టాయి. పహల్గాం ఉగ్రదాడి తర్వాత సోషల్ మీడియాలో వైరల్ అయిన ఒక ఫొటోలోని నలుగురు కీలక కమాండర్ల ముఠాలో మూసా చివరివాడు. తాజా ఎన్‌కౌంటర్‌తో ఆ నలుగురు ఉగ్రవాదుల ఏరివేత పూర్తయినట్లు కేంద్ర హోం మంత్రిత్వ శాఖ ఒక ప్రకటనలో వెల్లడించింది.
బుద్గాం జిల్లాలోని ఖాన్‌సాహిబ్ పోలీస్ స్టేషన్ పరిధిలోని గురువత్‌కలాన్ ప్రాంతంలో మూసా కదలికలపై భద్రతా దళాలకు పక్కా గూఢచార సమాచారం అందింది. దీంతో టెక్నికల్, హ్యూమన్ ఇంటెలిజెన్స్ ఆధారంగా జమ్మూకశ్మీర్ పోలీసులు, భద్రతా దళాలు సంయుక్తంగా ఆపరేషన్ చేపట్టాయి. ఈ ఆపరేషన్‌లో మూసా హతమైనట్లు అధికారులు ధ్రువీకరించారు. చాలాకాలంగా అతని కోసం గాలిస్తున్న భద్రతా దళాలు, ఎట్టకేలకు అతడిని మట్టుబెట్టాయి.
నాలుగేళ్ల వేట.. ఒక్కొక్కరిగా హతం
2022 నుంచి కశ్మీర్‌లో కార్యకలాపాలు సాగిస్తున్న ఈ నలుగురు కమాండర్లు అనేక హింసాత్మక ఘటనలకు పాల్పడ్డారు. 2025 ఏప్రిల్‌లో జరిగిన పహల్గాం దాడి తర్వాత, ఈ నలుగురు కంబాట్ దుస్తుల్లో కలిసి ఉన్న ఫొటో ఒకటి బయటకు వచ్చి వైరల్ అయింది. అప్పటి నుంచి వీరిపై భద్రతా దళాలు ప్రత్యేకంగా దృష్టి సారించాయి.
ఈ ముఠాలోని మొదటి ఉగ్రవాది కుల్గాంకు చెందిన లష్కరే కమాండర్ జునైద్ భట్‌ను 2024 డిసెంబర్ 3న శ్రీనగర్‌లోని దాచిగామ్ అటవీ ప్రాంతంలో జరిగిన ఎన్‌కౌంటర్‌లో హతమార్చారు. ఏడుగురి మృతికి కారణమైన గగన్‌గీర్ దాడిలో ఇతను కీలక సూత్రధారి.
రెండో ఉగ్రవాది సులేమాన్‌ను భద్రతా దళాలు 2025 జులై 28న ‘ఆపరేషన్ మహాదేవ్’ పేరుతో చేపట్టిన ఆపరేషన్‌లో మట్టుబెట్టాయి. వైరల్ ఫొటోలో ఉన్న సులేమాన్, పహల్గాం దాడిలో పాల్గొన్నట్లు దర్యాప్తులో తేలింది.
మూడో ఉగ్రవాది, పాకిస్థానీ జాతీయుడైన యాసిర్‌ను 2026 సెప్టెంబర్ 4న బుద్గాంలో జరిగిన ‘ఆపరేషన్ అష్దర్’లో హతమార్చారు.
లష్కరే నెట్‌వర్క్‌కు భారీ దెబ్బ
ఈ నలుగురు కమాండర్లు 2023లో జరిగిన హలాన్, కండి, దేహ్రా కీ గలీ దాడులతో పాటు 2024లో షాసితార్, శివ ఖోరి, గగన్‌గీర్, బూటాపత్రి దాడులు, 2025లో జరిగిన బైసారన్ దాడి వెనుక ఉన్నారని హోం శాఖ వెల్లడించింది.
ఇప్పుడు చివరివాడైన మూసా కూడా హతం కావడంతో కశ్మీర్ లోయలో ఎల్‌ఈటీ ఉగ్రవాద నెట్‌వర్క్‌కు గట్టి ఎదురుదెబ్బ తగిలినట్లయింది. భద్రతా దళాలు సుదీర్ఘకాలంగా చేపట్టిన ఈ ఆపరేషన్ విజయవంతంగా ముగియడం కీలక పరిణామంగా భావిస్తున్నారు.
