కేంద్ర ప్రభుత్వం కొత్తగా ప్రారంభించిన వికసిత్ భారత్–గ్యారంటీ ఫర్ రోజ్గార్ అండ్ ఆజీవికా మిషన్ (గ్రామీణ్) – VB-G RAM G పథకంలో తొలి నెలలోనే ఉపాధి కల్పన గణనీయంగా తగ్గింది. అధికారిక గణాంకాల ప్రకారం, 2026 జూలైలో ఈ పథకం ద్వారా 7.67 కోట్ల వ్యక్తి-రోజుల (Person-days) ఉపాధి కల్పించారు. గత ఏడాది జూలైలో MGNREGS కింద 15.33 కోట్ల వ్యక్తి-రోజులు నమోదయ్యాయి. దీంతో ఏడాది ప్రాతిపదికన ఉపాధి కల్పనలో 49.94 శాతం తగ్గుదల నమోదైంది.
దాదాపు రెండు దశాబ్దాలుగా అమలులో ఉన్న మహాత్మా గాంధీ జాతీయ గ్రామీణ ఉపాధి హామీ పథకం (MGNREGS) స్థానంలో కేంద్ర ప్రభుత్వం జూలై 1 నుంచి VB-G RAM G పథకాన్ని అమల్లోకి తీసుకొచ్చింది. కొత్త పథకం ద్వారా గ్రామీణ కుటుంబాలకు ఏడాదికి కల్పించే ఉపాధి హామీని 100 రోజుల నుంచి 125 రోజులకు పెంచడంతో పాటు వేతనాలను కూడా పెంచినట్లు ప్రభుత్వం పేర్కొంది.
VB-G RAM G పథకం ద్వారా గ్రామీణ ప్రాంతాల్లో కేవలం ఉపాధి కల్పించడమే కాకుండా శాశ్వత ఆస్తుల నిర్మాణం, గ్రామీణ మౌలిక వసతుల అభివృద్ధి, జీవనోపాధి మెరుగుదల వంటి అంశాలపై ఎక్కువగా దృష్టి పెట్టాలని కేంద్రం లక్ష్యంగా పెట్టుకుంది. అయితే పథకం అమల్లోకి వచ్చిన తొలి నెలలోనే ఉపాధి కల్పన గత ఏడాదితో పోలిస్తే భారీగా తగ్గడం చర్చనీయాంశంగా మారింది.
