మహారాష్ట్రలోని పుణేలో సంచలనం సృష్టించిన హత్య కేసులో ఊహించని మలుపులు చోటు చేసుకుంటున్నాయి. ఈ కేసులో తాజాగా క్రికెట్ కోణం తెరపైకి వచ్చింది. మృతురాలు సియా సోదరుడు పోలీసుల విచారణలో పలు కీలక విషయాలను వెల్లడించారు. ఈ హత్య వెనుక బెట్టింగ్ ముఠాల హస్తం ఉండొచ్చనే అనుమానాలు వ్యక్తమవుతుండటంతో కేసు దర్యాప్తు వేగవంతం చేశారు.
సియా సోదరుడు తెలిపిన వివరాల ప్రకారం.. క్రికెట్ మ్యాచ్ల నేపథ్యంలో భారీగా బెట్టింగ్ లావాదేవీలు జరిగినట్లు తెలుస్తోంది. ఈ ఆర్థిక లావాదేవీల వివాదమే సియా హత్యకు దారితీసి ఉంటుందని ఆయన ఆరోపిస్తున్నారు. గత కొంతకాలంగా కొందరు వ్యక్తులు ఆమెను బెదిరింపులకు గురి చేస్తున్నారని, దీనికి సంబంధించిన ఆధారాలను కూడా పోలీసులకు సమర్పించినట్లు సమాచారం.
ప్రస్తుతం ఈ క్రికెట్ బెట్టింగ్ కోణంపై పుణే పోలీసులు లోతుగా దర్యాప్తు చేస్తున్నారు. సియా మొబైల్ కాల్ డేటా, బ్యాంక్ అకౌంట్ వివరాలను పరిశీలిస్తున్నారు. ఈ హత్య కేసులో ప్రమేయం ఉన్న అసలు నిందితులను కఠినంగా శిక్షించాలని కుటుంబ సభ్యులు డిమాండ్ చేస్తున్నారు. త్వరలోనే ఈ కేసుకి సంబంధించిన పూర్తి నిజాలు బయటకు వస్తాయని పోలీసులు భావిస్తున్నారు.
