బాలీవుడ్ ప్రముఖ నటుడు ఇమ్రాన్‌ ఖాన్‌ను వెంటనే దేశం విడిచి వెళ్లాలన్న ముంబై పోలీసుల ఆదేశాలు చర్చనీయాంశం అయ్యాయి. ఈ దేశ పౌరుణ్ని భారత్ నుంచి పంపించడమేంటని పలువురికి సందేహం కలిగింది. కానీ, వాస్తవానికి అతడికి విదేశీ పౌరసత్వం ఉంది. భారత్‌లో ద్వంద్వ పౌరసత్వం విధానం లేదు. దీంతో అతడు భారత పౌరుడు కాదు. అయితే అతనొక్కడే కాదు. బాలీవుడ్‌లో పలువురు ప్రముఖులు భారత్‌లోనే ఉంటున్నప్పటికీ.. వారి పౌరసత్వం మాత్రం విదేశాల్లో ఉండడం గమనార్హం. వాళ్లెవరో చూద్దాం..
అలియా భట్‌, కత్రినా కైఫ్‌, సన్నీ లియోన్‌, ఇమ్రాన్‌ ఖాన్‌, జాక్వెలిన్‌ ఫెర్నాండెజ్‌ వంటి ప్రముఖులు ఈ జాబితాలో ఉన్నారు. భారతీయ సినిమాల్లో నటిస్తూ ప్రేక్షకులకు చేరువైన వీరిలో కొందరు బ్రిటన్‌, అమెరికా, కెనడా, శ్రీలంక, ఫ్రాన్స్‌ వంటి దేశాల పౌరసత్వం కలిగి ఉన్నట్లు నివేదికలు చెబుతున్నాయి.
‘రాజీ’, ‘గంగూబాయి కాఠియావాడి’, ‘రాకీ ఔర్‌ రాణీ కీ ప్రేమ్‌ కహానీ’ వంటి చిత్రాలతో గుర్తింపు పొందిన అలియా భట్‌ బ్రిటిష్‌ పౌరసత్వం కలిగి ఉన్నట్లు సమాచారం. కత్రినా కైఫ్‌ కూడా బ్రిటన్‌ పౌరురాలే. ‘నమస్తే లండన్‌’, ‘జిందగీ నా మిలేగీ దొబారా’, ‘ఏక్‌ థా టైగర్‌’, ‘టైగర్‌ 3’ వంటి సినిమాలతో ఆమె బాలీవుడ్‌లో విజయవంతమైన కెరీర్‌ను నిర్మించుకుంది.
సన్నీ లియోన్‌కు కెనడా, అమెరికా పౌరసత్వాలు ఉన్నట్లు కథనాలు పేర్కొంటున్నాయి. ‘జిస్మ్‌ 2’, ‘రాగిణి ఎంఎంఎస్‌ 2’, ‘ఏక్‌ పహేలీ లీలా’ చిత్రాల్లో ఆమె నటించింది. ‘జానే తూ.. యా జానే నా’తో పేరు తెచ్చుకున్న ఇమ్రాన్‌ ఖాన్‌ అమెరికా పౌరసత్వం కలిగి ఉన్నట్లు సమాచారం. ‘ఢిల్లీ బెల్లీ’, ‘ఐ హేట్‌ లవ్‌ స్టోరీస్‌’ వంటి సినిమాల్లోనూ నటించాడు.
‘రాక్‌స్టార్‌’తో బాలీవుడ్‌లోకి అడుగుపెట్టిన నర్గిస్‌ ఫక్రీ అమెరికా పౌరురాలిగా గుర్తింపు పొందింది. ‘దిల్‌బర్‌’ పాటతో విశేష ప్రజాదరణ పొందిన నోరా ఫతేహీ కెనడా పౌరసత్వం కలిగి ఉంది. ‘మర్డర్‌ 2’, ‘కిక్‌’, ‘హౌస్‌ఫుల్‌ 2’ వంటి చిత్రాల్లో నటించిన జాక్వెలిన్‌ ఫెర్నాండెజ్‌ శ్రీలంక పౌరురాలు.
పుదుచ్చేరిలో జన్మించిన కల్కి కొచ్లిన్‌ ఫ్రాన్స్‌ పౌరసత్వం కలిగి ఉంది. ‘దేవ్‌ డి’, ‘జిందగీ నా మిలేగీ దొబారా’, ‘యే జవానీ హై దీవానీ’ చిత్రాల్లో నటించారు. తెలుగు సినిమాలతో కెరీర్‌ ప్రారంభించి, ఆ తర్వాత బాలీవుడ్‌లోనూ గుర్తింపు తెచ్చుకున్న ఇలియానా పోర్చుగీస్‌ పౌరసత్వం ఉన్నట్లు నివేదికలు చెబుతున్నాయి. ‘సారాంశ్‌’, ‘మాన్‌సూన్‌ వెడ్డింగ్‌’, ‘రాజీ’ చిత్రాల్లో నటించిన సోనీ రజ్దాన్‌ బ్రిటిష్‌ పౌరసత్వం కలిగి ఉన్నట్లు సమాచారం.
