చలికాలం వచ్చిందంటే చాలు, మన ఆహారపు అలవాట్లలో కొన్ని మార్పులు చేసుకోవడం తప్పనిసరి. ఈ కాలంలో శరీరానికి వెచ్చదనాన్ని, పోషణను అందించే ఆహార పదార్థాలకు ప్రాధాన్యం ఇస్తాం. అలాంటి వాటిలో బాదం పప్పు ముందు వరుసలో ఉంటుంది. ప్రోటీన్లు, ఫైబర్, ఆరోగ్యకరమైన కొవ్వులు, విటమిన్ ఇ, మెగ్నీషియం వంటి పోషకాలతో నిండిన బాదం.. శీతాకాలంలో శరీరానికి అవసరమైన శక్తిని అందించి, సంపూర్ణ ఆరోగ్యానికి తోడ్పడుతుంది.
రోజుకు ఎన్ని తినాలి?
బాదంలో పోషకాలు పుష్కలంగా ఉన్నప్పటికీ, వాటిని మితంగా తీసుకోవాలని ఆరోగ్య నిపుణులు సూచిస్తున్నారు. సాధారణంగా ఒక వ్యక్తి వయసు, శారీరక శ్రమ, ఇతర ఆరోగ్య పరిస్థితులను బట్టి రోజుకు 5 నుంచి 10 బాదం గింజలు తినడం మంచిది. ఈ మోతాదులో తీసుకోవడం వల్ల శరీరానికి అవసరమైన పోషకాలు అందుతాయి. అదే సమయంలో వాటిలో క్యాలరీలు కొంచెం ఎక్కువ కాబట్టి, మోతాదుకు మించి తింటే బరువు పెరిగే ప్రమాదం ఉంటుంది.
ఎలా తినడం మంచిది?
బాదం గింజలను రాత్రంతా నీటిలో నానబెట్టి, ఉదయాన్నే తినడం వల్ల అనేక ప్రయోజనాలు ఉన్నాయి. ఇలా చేయడం వల్ల అవి మెత్తగా మారి, సులభంగా జీర్ణమవుతాయి. ముఖ్యంగా జీర్ణ సంబంధిత సమస్యలు ఉన్నవారికి ఇది ఎంతో మేలు చేస్తుంది. బాదం పై తొక్క తీయాలా వద్దా అనేది వ్యక్తిగత ఇష్టం. తొక్కలో కూడా ఫైబర్, ఇతర పోషకాలు ఉంటాయి కాబట్టి, తీయకపోయినా ఫర్వాలేదు. ఉదయాన్నే పరగడుపున లేదా ఇతర ఆహార పదార్థాలతో కలిపి కూడా వీటిని తీసుకోవచ్చు.
ప్రధాన ఆరోగ్య ప్రయోజనాలు
బాదంలో ఉండే ఆరోగ్యకరమైన కొవ్వులు, ప్రోటీన్ల వల్ల కొన్ని తిన్న వెంటనే కడుపు నిండిన భావన కలుగుతుంది. ఇది తరచుగా ఆకలి వేయకుండా నియంత్రించి, బరువును అదుపులో ఉంచుకోవడానికి సహాయపడుతుంది. అలాగే, ఇందులో సమృద్ధిగా లభించే విటమిన్ ఇ శక్తిమంతమైన యాంటీఆక్సిడెంట్‌గా పనిచేస్తుంది.
ఇది చలికాలంలో శరీర కణాలను ఫ్రీ రాడికల్స్ నుంచి రక్షించి, రోగనిరోధక శక్తిని పెంపొందించడంలో కీలకపాత్ర పోషిస్తుంది. బాదం పప్పులను నేరుగా స్నాక్‌గా తినడమే కాకుండా, పాలలో కలుపుకొని లేదా ఓట్స్, ఇతర అల్పాహారాల్లో చేర్చుకొని కూడా తినవచ్చు. ఏ రూపంలో తీసుకున్నా, మితంగా తీసుకోవడమే ఆరోగ్యానికి శ్రేయస్కరం.
