* ఇద్దరు బలి.. 15 మందికి పైగా బాధితులు?
* తాగునీరే శాపమా.. మరేదైనా కారణమా?
* ఇంటింటా హెల్త్ సర్వే, వైద్య శిబిరం నిర్వహించాలని సర్పంచ్, గ్రామస్తుల డిమాండ్
(ప్రత్యేక ప్రతినిధి, బూర్గంపహాడ్)
శ్రీకాకుళం జిల్లాలోని ‘ఉద్దానం’ పేరు వినగానే కిడ్నీ మహమ్మారి సృష్టించిన విలయమే గుర్తొస్తుంది. సరిగ్గా అలాంటి భయానక వాతావరణమే ఇప్పుడు భద్రాద్రి కొత్తగూడెం జిల్లా బూర్గంపహాడ్ మండలంలోని టేకుచెరువు గ్రామంలోనూ కమ్ముకుంటోంది. వరుసగా కిడ్నీ సంబంధిత వ్యాధుల బారిన పడుతున్న బాధితుల సంఖ్య పెరుగుతుండటం, ఇటీవల ఇద్దరు ప్రాణాలు కోల్పోవడంతో స్థానికంగా తీవ్ర భయాందోళనలు వ్యక్తమవుతున్నాయి.
బాధితుల ఆందోళన.. అంతుచిక్కని రోగం
టేకుచెరువులో ప్రస్తుతం దాదాపు 15 మందికి పైగా తీవ్ర కిడ్నీ సమస్యలతో బాధపడుతున్నట్లు గ్రామస్తులు చెబుతున్నారు. కొద్దిరోజుల వ్యవధిలోనే ఇద్దరు మృత్యువాత పడటంతో గ్రామంలో తీవ్ర విషాదం అలుముకుంది. అయితే, ఈ మరణాలు కిడ్నీ వైఫల్యం వల్లే జరిగాయా? లేక ఇతర దీర్ఘకాలిక వ్యాధుల ప్రభావమా? అనే అంశంపై వైద్యపరమైన నిర్ధారణ రావాల్సి ఉంది.
తాగునీటిపైనే అనుమానాలెన్నో..!
గ్రామంలో కిడ్నీ సమస్యలు హఠాత్తుగా ఎందుకు ప్రబలుతున్నాయన్న ప్రశ్న స్థానికులను తీవ్రంగా వేధిస్తోంది. ఇందుకు తాగునీటి కాలుష్యమే ప్రధాన కారణమై ఉంటుందని గ్రామస్తులు బలంగా అనుమానిస్తున్నారు. భూగర్భ జలాల్లో భారీ లోహాలు (హెవీ మెటల్స్), రసాయనాలు లేదా ఫ్లోరైడ్ వంటి హానికర మూలకాలు మోతాదుకు మించి చేరడం వల్లే మూత్రపిండాలు దెబ్బతింటున్నాయా అన్న అనుమానాలు వ్యక్తమవుతున్నాయి. అయితే, రక్త, మూత్ర పరీక్షలతో పాటు నీటి నమూనాలను ప్రయోగశాలలో నిశితంగా పరిశీలిస్తేనే అసలు నిజాలు వెలుగులోకి రానున్నాయి.
గ్రామస్తుల ఆక్రోశం గ్రామంలో నెలకొన్న తీవ్ర పరిస్థితులపై స్థానిక సర్పంచ్ బోళ్ల సైదమ్మ తీవ్ర ఆందోళన వ్యక్తం చేశారు. గ్రామంలో తక్షణమే ప్రత్యేక వైద్య శిబిరం ఏర్పాటు చేయాలని అధికారులను కోరారు. బాధితులకు మెరుగైన ఉచిత వైద్యం అందించడంతో పాటు, గ్రామంలోని అన్ని నీటి వనరుల శాంపిల్స్ సేకరించి ల్యాబ్ పరీక్షలకు పంపాలని డిమాండ్ చేశారు.
సమస్య తీవ్రరూపం దాల్చి ప్రాణనష్టం పెరగకముందే.. వైద్యారోగ్య శాఖ, ఆర్డబ్ల్యూఎస్ (గ్రామీణ నీటి సరఫరా) విభాగాలు తక్షణమే రంగంలోకి దిగి క్షేత్రస్థాయి విచారణ చేపట్టాలని టేకుచెరువు ప్రజలు కోరుతున్నారు. లేనిపక్షంలో టేకుచెరువు మరో ‘ఉద్దానం’గా మారే ప్రమాదం పొంచి ఉందని ఆవేదన వ్యక్తం చేస్తున్నారు.
