ఈజీ మనీకి అలవాటు.. ప్లాట్ల వ్యవహారాల్లోకి దళారుల ఎంట్రీ?
దినసరి కూలీ నుంచి రియల్‌ ఎస్టేట్‌ మధ్యవర్తిత్వం వరకు..
కొద్దికాలంలోనే భారీగా ఆస్తులు కూడబెట్టారనే ఆరోపణలు
అమాయకులే టార్గెట్‌.. “ఓనర్‌ నాకు తెలుసు” అంటూ మాయమాటలు..
పత్రాలు పరిశీలించకుండా పైసా ఇవ్వొద్దు: సామాజిక కార్యకర్త కురుమల శంకర్‌
చుంచుపల్లి, అక్టోబర్‌1(Y7 న్యూస్)
చుంచుపల్లి మండలం అభివృద్ధి చెందుతున్న నేపథ్యంలో భూములు, ప్లాట్లకు డిమాండ్‌ పెరుగుతోంది. ఇదే అదనుగా కొందరు మధ్యవర్తులు, దళారులు రంగంలోకి దిగి అమాయక కొనుగోలుదారులను మాయమాటలతో నమ్మించి ప్లాట్ల లావాదేవీలు జరుపుతున్నారనే ఆరోపణలు వినిపిస్తున్నాయి. దినసరి కూలీ పనులు చేసుకుంటూ జీవించిన కొందరు సైతం ‘ఈజీ మనీ’కి అలవాటు పడి రియల్‌ ఎస్టేట్‌ మధ్యవర్తిత్వం వైపు మళ్లుతున్నారని, కొద్దికాలంలోనే భారీగా డబ్బు సంపాదిస్తున్నారనే ఆరోపణలు ఉన్నాయని సామాజిక కార్యకర్త కురుమల కురిమెళ్ల శంకర్‌ తెలిపారు.చదువు, అనుభవం పెద్దగా లేకపోయినా భూములు, ప్లాట్ల వ్యవహారాల్లో మధ్యవర్తులుగా మారి అమాయకుల నమ్మకాన్ని ఆసరాగా చేసుకుంటున్నారని ఆయన ఆరోపించారు. అయితే ఎవరైనా అక్రమంగా ఆస్తులు సంపాదించారనే విషయాన్ని ఆధారాలు లేకుండా నిర్ధారించలేమని, వారి ఆస్తులు, లావాదేవీలపై సంబంధిత అధికారులు సమగ్రంగా పరిశీలిస్తే వాస్తవాలు వెలుగులోకి వస్తాయని అన్నారు.
“ఓనర్‌ నాకు బాగా తెలుసు”.. ఇదే మాయమాట!
ప్లాట్‌ కొనుగోలు చేసేందుకు వచ్చే వారిని లక్ష్యంగా చేసుకుని కొందరు మధ్యవర్తులు “ఆ ప్లాట్‌ ఓనర్‌ నాకు బాగా తెలుసు.. నాకు చాలా పరిచయం.. మీకు ఎంత కావాలంటే అంతకు ఇప్పిస్తా” అంటూ నమ్మిస్తున్నారని శంకర్‌ తెలిపారు. ఇలాంటి మాటలు నమ్మి జీవితాంతం కష్టపడి కూడబెట్టిన సొమ్మును అడ్వాన్స్‌గా ఇచ్చిన తర్వాత అసలు యజమాని వేరే వ్యక్తి అని తేలితే కొనుగోలుదారులు తీవ్రంగా నష్టపోయే ప్రమాదం ఉందన్నారు.కొన్ని సందర్భాల్లో అసలు యజమానులకు తెలియకుండానే ప్లాట్లపై ఒప్పందాలు, ఇతర పత్రాలు సృష్టించి విక్రయించేందుకు ప్రయత్నాలు జరుగుతున్నాయని ఆయన ఆరోపించారు. పత్రాలు నిజమైనవేనా? వాటిని రాసే వ్యక్తికి భూమిపై చట్టబద్ధమైన హక్కు ఉందా? గతంలో ఆ భూమిపై ఏమైనా లావాదేవీలు జరిగాయా? అనే అంశాలను ముందుగానే నిర్ధారించుకోకుండా డబ్బులు చెల్లిస్తే సమస్యలు తప్పవని హెచ్చరించారు.
రిజిస్ట్రేషన్‌ సమస్యలే దళారులకు అవకాశమా?
చుంచుపల్లి మండలంలోని కొన్ని ప్రాంతాల్లో భూముల రిజిస్ట్రేషన్‌, హక్కులు, పత్రాల విషయంలో స్పష్టత లేని పరిస్థితులను కొందరు మధ్యవర్తులు తమకు అనుకూలంగా ఉపయోగించుకుంటున్నారనే ఆరోపణలు ఉన్నాయి. నమ్మకంతో కాగితాలు రాసుకోవడం, అడ్వాన్స్‌లు ఇవ్వడం వంటి వ్యవహారాలు భవిష్యత్‌లో వివాదాలకు దారితీసే అవకాశం ఉందని శంకర్‌ పేర్కొన్నారు.
“దళారి చెప్పిన మాటే ఆధారం అనుకుని ప్లాట్‌ కొనొద్దు. ముందుగా ఆ భూమి ఎవరిది? హక్కుదారు ఎవరు? విక్రయించే వ్యక్తికి చట్టబద్ధమైన అధికారం ఉందా? పత్రాలు అసలైనవేనా? అనే విషయాలను పూర్తిగా తెలుసుకోవాలి. జీవితాంతం కష్టపడి కూడబెట్టిన సొమ్మును ఒక్క పొరపాటుతో కోల్పోవద్దు” అని ఆయన సూచించారు.
కష్టార్జితం.. క్షణాల్లో ఆవిరి!
ప్లాట్‌ కొనుగోలు అనేది జీవితకాల పెట్టుబడితో ముడిపడిన వ్యవహారమని శంకర్‌ అన్నారు. ఒకసారి డబ్బులు చెల్లించిన తర్వాత వివాదం తలెత్తితే వాటిని తిరిగి పొందడం అంత సులభం కాదని పేర్కొన్నారు. అందువల్ల కొనుగోలుదారులు మధ్యవర్తుల మాటలను మాత్రమే నమ్మకుండా అసలు యజమానిని స్వయంగా కలవాలని, సంబంధిత రెవెన్యూ, రిజిస్ట్రేషన్‌ రికార్డులను పరిశీలించాలని సూచించారు.
అవసరమైతే న్యాయ నిపుణుల సలహా తీసుకున్న తర్వాతే అడ్వాన్స్‌ లేదా ఇతర మొత్తాలు చెల్లించాలని కోరారు. “ప్లాట్‌ నచ్చిందని వెంటనే డబ్బులు ఇవ్వొద్దు.. ముందుగా పత్రాలు క్లియర్‌గా ఉన్నాయో లేదో చూడాలి. దళారి మాటల కంటే అధికారిక రికార్డులనే నమ్మాలి” అని సామాజిక కార్యకర్త కురుమల కురిమెళ్ల శంకర్‌ ప్రజలకు విజ్ఞప్తి చేశారు.చుంచుపల్లి మండలంలో ప్లాట్లు కొనుగోలు చేసే ప్రతి ఒక్కరూ అప్రమత్తంగా ఉండాలని.. తస్మాత్‌ జాగ్రత్తగా వ్యవహరించాలని ఆయన సూచించారు.
