ఆరోగ్యకరమైన ఆహారం తీసుకోవడంపై శ్రద్ధ చూపే చాలామంది.. వంట చేసేటప్పుడు ఉపయోగించే వస్తువుల పరిశుభ్రతను మాత్రం పట్టించుకోరు. ముఖ్యంగా కూరగాయలు, పండ్లు, మాంసం వంటి ఆహార పదార్థాలను కట్ చేసేందుకు ఉపయోగించే చాపింగ్ బోర్డు విషయంలో ప్రత్యేక జాగ్రత్తలు తీసుకోవాలని నిపుణులు సూచిస్తున్నారు. బోర్డును సరిగ్గా ఎంచుకోవడంతో పాటు దాన్ని పరిశుభ్రంగా ఉంచడం కూడా ఎంతో ముఖ్యం.
మార్కెట్లో ప్లాస్టిక్, చెక్క, స్టీల్ తదితర రకాల చాపింగ్ బోర్డులు అందుబాటులో ఉన్నాయి. ఒక్కో రకానికి ప్రత్యేకమైన ప్రయోజనాలతో పాటు కొన్ని ప్రతికూలతలు కూడా ఉంటాయి. ముఖ్యంగా మాంసం, కూరగాయలు, పండ్లు వంటి వేర్వేరు ఆహార పదార్థాలకు ఒకే బోర్డును ఉపయోగించడం వల్ల సూక్ష్మక్రిములు ఒక ఆహారం నుంచి మరోదానికి వ్యాపించే అవకాశం ఉంటుంది.
అందుకే పరిశుభ్రత, కత్తి పదును, బోర్డు నిర్వహణ, ఉపయోగించే ఆహార పదార్థాలను దృష్టిలో ఉంచుకుని సరైన చాపింగ్ బోర్డును ఎంచుకోవాలని నిపుణులు చెబుతున్నారు. అలాగే ప్రతి ఉపయోగం తర్వాత బోర్డును పూర్తిగా శుభ్రం చేసి, తేమ లేకుండా ఆరబెట్టడం కూడా చాలా ముఖ్యం. ముఖ్యంగా మాంసం వంటి ఆహార పదార్థాలకు ప్రత్యేక బోర్డును ఉపయోగించడం ద్వారా క్రాస్ కంటామినేషన్ ప్రమాదాన్ని తగ్గించుకోవచ్చని సూచిస్తున్నారు.
