మార్కెట్లో కొనుగోలు చేసిన అరటిపండ్లు కొద్దిరోజులకు తొక్కపై నల్లటి మచ్చలతో కనిపిస్తే చాలామంది అవి పాడైపోయాయని భావించి పారేస్తుంటారు. అయితే తొక్కపై నల్లటి మచ్చలు రావడం, లోపల మెత్తగా మారడం మాత్రమే అరటిపండు పాడైపోయిందని అర్థం కాదు. పండు పండే కొద్దీ అందులోని పిండిపదార్థాలు సహజ చక్కెరలుగా మారి మరింత తియ్యగా మారుతాయి.
అయితే అరటిపండు పూర్తిగా కుళ్లిపోయి దుర్వాసన రావడం, బూజు కనిపించడం లేదా అసాధారణంగా మారిన లక్షణాలు ఉంటే మాత్రం తినకుండా ఉండటం మంచిది. తాజాగా బాగా పండిన అరటిపండ్లను మాత్రం వృథా చేయకుండా వివిధ రకాల వంటకాల్లో ఉపయోగించుకోవచ్చు.
స్వాతంత్ర్య దినోత్సవ వేడుకలు, పండుగలు లేదా ఇంట్లో జరిగే ప్రత్యేక కార్యక్రమాల్లో బాగా పండిన అరటిపండ్లతో రుచికరమైన డెజర్ట్స్ తయారు చేసుకోవచ్చు. అరటి షేక్, బనానా పాన్కేక్స్, బనానా హల్వా, బనానా బ్రెడ్ వంటి వంటకాలను సులభంగా తయారు చేసుకోవచ్చు. పిల్లలు, పెద్దలు ఇష్టపడే ఈ వంటకాలతో పండిన అరటిపండ్లను వృథా కాకుండా ఉపయోగించుకోవచ్చు.
