కృత్రిమ మేధస్సు (AI) ప్రపంచవ్యాప్తంగా ఉద్యోగాల స్వరూపాన్ని వేగంగా మార్చుతోంది. AI ఆధారిత టెక్నాలజీలు వివిధ రంగాల్లోకి విస్తరిస్తున్న నేపథ్యంలో కొన్ని సంప్రదాయ ఉద్యోగాలపై ప్రభావం పడే అవకాశం ఉంది. అయితే అదే సమయంలో AI ఆధారంగా భారీ సంఖ్యలో కొత్త ఉద్యోగాలు, కొత్త కెరీర్ అవకాశాలు కూడా అందుబాటులోకి రానున్నాయని అంచనాలు సూచిస్తున్నాయి.
ప్రపంచ ఆర్థిక వేదిక (World Economic Forum) విడుదల చేసిన Future of Jobs Report 2025 ప్రకారం.. 2030 నాటికి ప్రపంచ ఉద్యోగ మార్కెట్లో గణనీయమైన మార్పులు చోటుచేసుకోనున్నాయి. టెక్నాలజీ అభివృద్ధి, AI వినియోగం, ఆటోమేషన్ వంటి అంశాలు ఉద్యోగాల స్వభావాన్ని మార్చడంతో పాటు సంస్థలకు అవసరమైన నైపుణ్యాల్లోనూ మార్పులు తీసుకురానున్నాయి.
ఈ నేపథ్యంలో ఉద్యోగులు తమ నైపుణ్యాలను ఎప్పటికప్పుడు అప్డేట్ చేసుకోవాల్సిన అవసరం పెరుగుతోంది. ముఖ్యంగా AI, డేటా, సైబర్ సెక్యూరిటీ, టెక్నాలజీకి సంబంధించిన నైపుణ్యాలతో పాటు సృజనాత్మకత, సమస్య పరిష్కారం, కమ్యూనికేషన్ వంటి మానవ నైపుణ్యాలకు కూడా భవిష్యత్తులో డిమాండ్ పెరిగే అవకాశం ఉంది. AIను ఉద్యోగాలకు ప్రత్యామ్నాయంగా కాకుండా కొత్త అవకాశాలకు మార్గంగా ఉపయోగించుకునే వారికి మంచి కెరీర్ అవకాశాలు లభించవచ్చని నిపుణులు భావిస్తున్నారు.
