మత్తు పదార్థాలకు దూరంగా ఉండాలని యువతకు సూచన
భద్రాచలం, జూలై 15 (వై7 న్యూస్):
భద్రాచలం డివిజన్ డీఎస్పీ ఎం. అరుణ్ కుమార్ బుధవారం పట్టణ సీఐ నాగరాజుతో కలిసి భద్రాచలంలోని డీ-అడిక్షన్ సెంటర్ను సందర్శించారు. అక్కడ చికిత్స పొందుతున్న బాధితులను కలుసుకుని వారి ఆరోగ్య పరిస్థితి, అందుతున్న వైద్య సేవలు, సదుపాయాల గురించి అడిగి తెలుసుకున్నారు.
ఈ సందర్భంగా బాధితులతో ప్రత్యేకంగా సమావేశమైన డీఎస్పీ, మాదక ద్రవ్యాలు, మద్యం మరియు ఇతర మత్తు పదార్థాల వినియోగం వల్ల కలిగే దుష్పరిణామాలపై అవగాహన కల్పించారు. మత్తు పదార్థాలకు బానిస కావడం వల్ల వ్యక్తిగత ఆరోగ్యం దెబ్బతినడమే కాకుండా కుటుంబాలు విచ్ఛిన్నమవుతాయని, సమాజంలో గౌరవం కోల్పోయే పరిస్థితులు ఏర్పడతాయని హెచ్చరించారు.
చికిత్స పూర్తయిన తర్వాత బాధితులు పాత అలవాట్లకు పూర్తిగా స్వస్తి చెప్పి, ఆత్మవిశ్వాసంతో కొత్త జీవితాన్ని ప్రారంభించాలని సూచించారు. ముఖ్యంగా యువత చెడు వ్యసనాలకు దూరంగా ఉండి విద్య, ఉపాధి, కుటుంబ బాధ్యతలపై దృష్టి సారించాలని పిలుపునిచ్చారు.
మత్తు పదార్థాల నిర్మూలనకు ప్రతి ఒక్కరూ సహకరించాలని, ఆరోగ్యకరమైన సమాజ నిర్మాణంలో భాగస్వాములు కావాలని డీఎస్పీ కోరారు.
ఈ కార్యక్రమంలో పట్టణ సీఐ నాగరాజు, ఎస్ఐ స్వప్న, డీ-అడిక్షన్ సెంటర్ నిర్వాహకులు మరియు సిబ్బంది పాల్గొన్నారు.
