పశ్చిమ బెంగాల్ రాజధాని కోల్కతాలోని తారాతల ప్రాంతంలో బుధవారం మధ్యాహ్నం ఓ భారీ ప్రమాదం చోటుచేసుకుంది. బ్రేస్ బ్రిడ్జి సమీపంలోని ట్రాన్స్పోర్ట్ డిపో రోడ్డులో నిర్మాణంలో ఉన్న మూడంతస్తుల గోదాం ఒక్కసారిగా కుప్పకూలింది. ప్రమాద సమయంలో అక్కడ సుమారు 40 నుంచి 50 మంది కార్మికులు పనిచేస్తున్నట్లు తెలుస్తోంది. పైకప్పు కాస్టింగ్ పనులు జరుగుతుండగా కాంక్రీట్ స్లాబ్లు, భారీ ఇనుప బీమ్లు అమాంతం కూలిపోవడంతో పెద్ద సంఖ్యలో కార్మికులు శిథిలాల కింద చిక్కుకుపోయారు. ఈ దుర్ఘటనలో ఇప్పటివరకు ఐదుగురు కార్మికులు ప్రాణాలు కోల్పోగా, మరో 17 మందికి పైగా తీవ్రంగా గాయపడి ఆసుపత్రిలో చికిత్స పొందుతున్నారు.
సమాచారం అందుకున్న వెంటనే కోల్కతా పోలీసులు, అగ్నిమాపక సిబ్బంది, ఎన్డీఆర్ఎఫ్ (NDRF), ఎస్డీఆర్ఎఫ్ (SDRF) దళాలు హుటాహుటిన ఘటనా స్థలానికి చేరుకుని సహాయక చర్యలు చేపట్టాయి. రాష్ట్ర ప్రభుత్వ విజ్ఞప్తి మేరకు భారత సైన్యం కూడా రంగంలోకి దిగి రెస్క్యూ ఆపరేషన్లో పాల్గొంటోంది. భారీ క్రేన్లు, గ్యాస్ కట్టర్ల సాయంతో కాంక్రీట్ శిథిలాలను, ఇనుప రాడ్లను తొలగించి కార్మికులను బయటకు తీస్తున్నారు. శిథిలాల కింద ఇంకా 12 నుంచి 15 మంది దాకా ప్రాణాలతో చిక్కుకున్నట్లు అధికారులు భావిస్తున్నారు. వారిని గుర్తించేందుకు సహాయక బృందాలు స్నిఫర్ డాగ్స్, డ్రోన్లను ఉపయోగిస్తున్నాయి. శిథిలాల అడుగు నుంచి సహాయం కోసం ఆర్తనాదాలు వినిపిస్తుండటంతో రెస్క్యూ ఆపరేషన్ను మరింత ముమ్మరం చేశారు.
పశ్చిమ బెంగాల్ ముఖ్యమంత్రి సువేందు అధికారి, పలువురు మంత్రులు, ఉన్నతాధికారులు ఘటనా స్థలాన్ని సందర్శించి సహాయక చర్యలను స్వయంగా పర్యవేక్షించారు. క్షతగాత్రులను వెంటనే ఎస్ఎస్కేఎం (SSKM) ఆసుపత్రికి తరలించి మెరుగైన వైద్యం అందిస్తున్నట్లు ముఖ్యమంత్రి వెల్లడించారు. ఈ ప్రమాదంపై సమగ్ర విచారణ జరిపిస్తామని, నిర్మాణంలో నాసిరకం సామగ్రి వాడటం లేదా డిజైన్ లోపాలు ఉన్నట్లు తేలితే బాధ్యులపై కఠిన చర్యలు తీసుకుంటామని ప్రభుత్వం స్పష్టం చేసింది. బాధితుల కుటుంబాలకు అవసరమైన సమాచారం అందించేందుకు రాష్ట్ర ప్రభుత్వం నబన్నలో ప్రత్యేక కంట్రోల్ రూమ్ను ఏర్పాటు చేసి హెల్ప్లైన్ నంబర్లను అందుబాటులోకి తీసుకొచ్చింది.
