కామేపల్లి,ఆగస్టు 07 వై 7 న్యూస్:
ఒకసారి రోడ్డుప్రమాదం జీవితాన్ని కుదిపేసింది. అప్పట్లో కష్టాల్లో కూరుకుపోయిన ఓ యువకుడు… ఇప్పుడు అనేక మందికి చీకటి సమయంలో దీపంలా మారాడు. ఆయన పేరు చల్లా తిరుమలరావు. ఒక యువ సాఫ్ట్వేర్ ఇంజినీర్, ఓ ఉదాత్త హృదయవంతుడు, అసలైన మానవతావాది.
కామేపల్లి మండలం ముచ్చర్ల గ్రామానికి చెందిన నిరుపేద కుటుంబంలో పుట్టిన తిరుమలరావు, తన ఇంజినీరింగ్ చదువు మధ్యలోనే జరిగిన రోడ్డుప్రమాదంతో తీవ్రమైన గాయాల పాలయ్యాడు. కుటుంబం ఆర్థికంగా బలహీనంగా ఉండటంతో వైద్యం కోసం ధనసాధన అనేక ఇబ్బందుల్ని ఎదుర్కొన్నాడు. ఆ క్షణాల్లో తన కుటుంబం అనుభవించిన ఆత్మవేదనను మర్చిపోలేని తలంపుగా మోసుకుంటూ, తిరుమలరావు తనకు తానుగా ఒక నిర్ణయం తీసుకున్నాడు. “జీవితంలో ఎదిగిన వెంటనే, పేదల కోసం అంకితభావంతో పనిచేయాలి!”
వృత్తిలో టెక్నాలజీ… హృదయంలో మానవతా చైతన్యం
బీటెక్ పూర్తిచేసిన తర్వాత హైదరాబాద్లో సాఫ్ట్వేర్ ఉద్యోగం మొదలుపెట్టారు. సాధించిన ఆదాయాన్ని కుటుంబ అవసరాలకే కాదు,సమాజానికి తిరిగి అందించాలన్న సంకల్పానికి పునాదిగా వాడుకుంటున్నారు. ప్రతి నెల తన వేతనం నుంచి కొంత భాగాన్ని సేవా కార్యక్రమాలకు కేటాయిస్తున్నారు.
సేవలో ముందుండే ‘సత్యపథి’
కోవిడ్ కాలంలో హైదరాబాద్లో ‘సేవ్ ఆహార్’ కార్యక్రమానికి తన వంతు సహాయం అందించి ఆకలితో బాధపడుతున్న వందలమందికి అన్నపానీయాలు అందించారు. ఉమ్మడి ఖమ్మం జిల్లాలోని పలు గ్రామాలలో ఉన్న ప్రభుత్వ పాఠశాలలకు, గ్రంథాలయాలకు కంప్యూటర్లు దానం చేసి నిరుద్యోగ యువతకు డిజిటల్ అవగాహన పెరిగేలా చేశారు.
రోడ్ల మీద ఉన్నవారికి ఒడిదుడుకుల్లో ఓ మానవ చెయి
ఖమ్మం, హైదరాబాద్ రహదారుల వెంట నివాసముండే అనాథలకు పలుమార్లు దుస్తులు, దుప్పట్లు అందించారు. అదే విధంగా, గ్రామాల నుంచి హైదరాబాద్ వైద్యసేవల కోసం వచ్చే పేద రోగుల కోసం ఉచిత వసతి, అవసరమైన మెడికల్ గైడెన్స్తో పాటు ప్రయాణ ఖర్చుల సహాయాన్ని అందిస్తూ ఉన్నారు.
రక్తదానం నుంచి గోశాలల దాకా సేవల విస్తరణ
థలసీమియాతో బాధపడుతున్న చిన్నారుల కోసం రక్తదాన శిబిరాలను ఏర్పాటు చేసి, యువతలో రక్తదాన పట్ల చైతన్యం పెంచే కార్యక్రమాలను నిర్వహిస్తున్నారు. ఉమ్మడి ఖమ్మం జిల్లాలోని పలు గోశాలలకు మేత, దాణా కోసం నగదు సహాయాన్ని అందిస్తున్నారు.
“సేవ చేయడం జీవితానికి అర్ధం” తిరుమలరావు
“ఒకప్పుడు నేను ఎలాంటి కష్టాలు అనుభవించానో తెలుసు. అందుకే నాకు తెలిసిన బాధను తగ్గించగలుగుతానని భావించిన ప్రతి చోట సాయం చేయాలని నా సంకల్పం,” అని చెబుతున్నాడు తిరుమలరావు.
“ఒక ప్రమాదం నా జీవితాన్ని మార్చేసింది. ఇప్పుడు నా సేవలతో ఎవరైనా ఒకరు చిరునవ్వు చిందిస్తే చాలు… అదే నాకు అంతులేని తృప్తి,” అంటున్నాడు.
సేవకు వయస్సు అడ్డుకాదు… స్థితి అడ్డుకాదు… కావలసింది కేవలం సంకల్పం!
చిన్న వయస్సులోనే పెద్ద మానవతా పాఠాన్ని నేర్చుకుని, సమాజానికి సేవ చేసే మార్గాన్ని ఎన్నుకున్న చల్లా తిరుమలరావు… నేటి యువతకు జీవించాల్సిన దారి, చేయాల్సిన కర్తవ్యాన్ని చూపిస్తున్నారు.
