‘ఇరుముడి’ సినిమా విజయాన్ని పురస్కరించుకుని నిర్వహించిన సక్సెస్ వేడుకలో హీరో రవితేజ ఆసక్తికర వ్యాఖ్యలు చేశారు. సినిమాలో నటించిన ప్రతి ఒక్కరినీ ప్రత్యేకంగా ప్రస్తావిస్తూ అభినందనలు తెలిపారు. ముఖ్యంగా దర్శకుడు శివపై తనకున్న నమ్మకాన్ని వ్యక్తం చేస్తూ, ఆయన వ్యక్తిత్వం, సినిమా కోసం చేసిన కృషిని రవితేజ ప్రశంసించారు.
సినిమాలో భార్గవ్, కిషోర్, కొమరం తదితరులు అద్భుతంగా నటించారని రవితేజ అన్నారు. ఇలాంటి నటులతో విభిన్నమైన పాత్రలు చేయించడం దర్శకుడు శివకు ఉన్న కాన్ఫిడెన్స్, కన్విక్షన్కు నిదర్శనమని పేర్కొన్నారు. రమేష్ ఇంద్ర, శ్వాసిక, అజయ్ ఘోష్, ప్రణీత తదితరులు తమ పాత్రల్లో ఆకట్టుకున్నారని తెలిపారు. ముఖ్యంగా శ్వాసిక నటన అద్భుతంగా ఉందంటూ సరదాగా ప్రశంసలు కురిపించారు. సామ్ సహా యువ నటీనటులకు మంచి భవిష్యత్ ఉందని ఆకాంక్షించారు.
సినిమాకు పనిచేసిన సాంకేతిక నిపుణులను కూడా రవితేజ అభినందించారు. సినిమాటోగ్రాఫర్ విష్ణు అద్భుతమైన విజువల్స్ అందించారని ప్రశంసించారు. దర్శకుడు, సినిమాటోగ్రాఫర్ మధ్య మంచి అనుబంధం ఉంటే సినిమా మరింత అద్భుతంగా తెరకెక్కుతుందని, విష్ణుతో మరోసారి కలిసి పనిచేయాలని ఉందని రవితేజ తన కోరికను వెల్లడించారు. ఆయన పాజిటివ్ నేచర్ను కూడా ప్రత్యేకంగా కొనియాడారు.
