బాలీవుడ్ అగ్రనటి ఐశ్వర్య రాయ్ బచ్చన్, అభిషేక్ బచ్చన్‌ను వివాహం చేసుకోకముందు ఓ ఇంటర్వ్యూలో తనకు కాబోయే జీవిత భాగస్వామిలో ఉండాల్సిన లక్షణాల గురించి ఆసక్తికర విషయాలను వెల్లడించింది. సీనియర్ నటి ఫరీదా జలాల్‌తో అప్పట్లో జరిగిన ఈ సంభాషణ తాలూకు వివరాలు తాజాగా మరోసారి వెలుగులోకి వచ్చాయి. ఈ ఇంటర్వ్యూలో ఐశ్వర్య తన మనసులోని మాటలను పంచుకుంది.
తనకు కాబోయే వ్యక్తి సున్నిత మనస్కుడై ఉండటంతో పాటు, మంచి హాస్య చతురతను కలిగి ఉండాలని ఐశ్వర్య పేర్కొంది. తనను తాను చూసి నవ్వుకోగల చమత్కారం ఉండాలని ఆమె అభిప్రాయపడింది.
“అతను ఇతరులను గౌరవిస్తూనే, తనను తాను గౌరవించుకోవాలి. ఎలాంటి సంక్లిష్టతలు లేని, ఇతరులను తప్పుగా అంచనా వేయని (జడ్జ్‌మెంట్ చేయని) వ్యక్తి అయి ఉండాలి. మనుషులను ఉన్నది ఉన్నట్లుగా అర్థం చేసుకోగలగాలి” అని ఆమె వివరించింది.
అన్నింటికంటే ముఖ్యంగా, ఏ బంధమైనా చిరకాలం నిలవడానికి ‘అనుకూలత’ (కంపాటిబిలిటీ) ఎంతో కీలకమని ఐశ్వర్య అభిప్రాయపడింది. “రోజు చివరలో మనకు ముఖ్యమైనది అనుకూలత మాత్రమే. బహుశా ఇద్దరు వ్యక్తులను కలిపి ఉంచే సన్నని దారం అదే కావచ్చు” అని ఆమె వ్యాఖ్యానించింది.
ఐశ్వర్య రాయ్, అభిషేక్ బచ్చన్ 2007 ఏప్రిల్ 20న వివాహ బంధంతో ఒక్కటయ్యారు. ఈ దంపతులకు 2011లో ఆరాధ్య జన్మించింది. వీరిద్దరూ కలిసి ‘గురు’, ‘రావణ్’, ‘ధూమ్ 2’, ‘సర్కార్ రాజ్’ వంటి పలు విజయవంతమైన చిత్రాల్లో నటించి మెప్పించారు.
