బెండకాయ అంటే ఇష్టపడేవారు చాలామందే ఉంటారు. అయితే కొందరు మాత్రం దాని జిగురు కారణంగా తినడానికి ఇష్టపడరు. కానీ ఆ జిగురులోనే ఆరోగ్యానికి మేలు చేసే గుణాలు ఉన్నాయని జీర్ణకోశ నిపుణులు చెబుతున్నారు. బెండకాయలోని పీచు పదార్థం జీర్ణక్రియకు తోడ్పడటంతో పాటు కొలెస్ట్రాల్‌ నియంత్రణలోనూ ఉపయోగపడే అవకాశం ఉందని వివరిస్తున్నారు.
బెండకాయ నీటితో కలిసినప్పుడు జెల్‌లా మారి కరిగే పీచు పదార్థం అందులో ఉంటుంది. దీనినే మ్యూసిలేజ్‌ అంటారు. బెండకాయకు జిగురు స్వభావం రావడానికి ఇదే కారణం. ఈ పీచు పదార్థం వల్ల జీర్ణవ్యవస్థకు పలు ప్రయోజనాలు కలగవచ్చు.
మలబద్ధకానికి ఉపశమనం
బెండకాయలోని కరిగే పీచు పదార్థం మల విసర్జన సాఫీగా జరిగేందుకు తోడ్పడుతుంది. పేగుల్లో అది ముందుకు కదలడానికి పీచు ఉపయోగపడుతుంది. దీంతో మలబద్ధకం సమస్యను నివారించడంలో సహాయపడవచ్చు. అయితే తగినంత నీరు తాగడం, సమతుల ఆహారం తీసుకోవడం కూడా ముఖ్యం.
పేగుల్లో మంచి బ్యాక్టీరియాకు మేలు
మన జీర్ణవ్యవస్థలో అనేక రకాల సూక్ష్మజీవులు ఉంటాయి. వీటిలో కొన్ని పీచు పదార్థాలను ఆహారంగా ఉపయోగించుకుంటాయి. బెండకాయ వంటి పీచు ఎక్కువగా ఉండే కూరగాయలను తినడం వల్ల పేగుల్లోని సూక్ష్మజీవుల ఆరోగ్యానికి మద్దతు లభించవచ్చు. ఇది జీర్ణవ్యవస్థ ఆరోగ్యంగా ఉండేందుకు తోడ్పడుతుంది.
కొలెస్ట్రాల్‌ తగ్గించడంలోనూ సాయపడుతుందా?
బెండకాయలోని పీచు పదార్థం పిత్త ఆమ్లాలను బంధించి, మలం ద్వారా అవి బయటకు వెళ్లేందుకు తోడ్పడవచ్చని ప్రయోగశాల, జంతువులపై చేసిన కొన్ని అధ్యయనాలు సూచిస్తున్నాయి. పిత్త ఆమ్లాలను తయారు చేయడానికి కాలేయం కొలెస్ట్రాల్‌ను ఉపయోగిస్తుంది. అవి ఎక్కువగా బయటకు వెళ్లినప్పుడు కొత్త పిత్త ఆమ్లాలను తయారు చేసేందుకు కాలేయం మరింత కొలెస్ట్రాల్‌ను వినియోగించే అవకాశం ఉంటుంది.
అయితే ఈ పరిశోధనల ఆధారంగా బెండకాయ తింటే కచ్చితంగా కొలెస్ట్రాల్‌ తగ్గుతుందని చెప్పలేం. మనుషులపై మరిన్ని అధ్యయనాలు అవసరం. కొలెస్ట్రాల్‌ సమస్య ఉన్నవారు వైద్యులు సూచించిన చికిత్సను కొనసాగిస్తూ, సమతుల ఆహారంలో భాగంగా బెండకాయను తీసుకోవచ్చు. కూరగా, మసాలాలతో వేయించి లేదా పులుసులో వేసుకుని తినొచ్చు.
