జీవితంలో ఏదైనా గొప్ప విజయం సాధించినప్పుడే ఆనందం కలుగుతుందని అనుకుంటాం. ఏదైనా ప్రత్యేకమైన రోజు వస్తేనే మనసుకు ఉత్సాహం వస్తుందని భావిస్తాం. కానీ రోజూ మనం చేసే చిన్నచిన్న పనుల్లోనూ ఆనందాన్ని వెతుక్కోవచ్చు. ఉదయం నిద్రలేచిన దగ్గర నుంచి రాత్రి పడుకునే వరకు కొన్ని అలవాట్లను పాటిస్తే మనసుకు ప్రశాంతత లభిస్తుంది. రోజంతా జరిగిన విషయాలను హాయిగా ఆస్వాదించగలుగుతాం. మరి, రోజువారీ జీవితాన్ని మరింత అర్థవంతంగా మార్చే ఆ ఐదు చిన్న అలవాట్లు ఏంటో తెలుసుకుందాం..
1. ఉదయం లేవగానే ఫోన్‌ చూడకండి
నిద్రలేవగానే ఫోన్‌ తీసుకుని మెసేజ్‌లు, వార్తలు, సోషల్‌ మీడియా చూడటం చాలామందికి అలవాటు. అలా కాకుండా ఉదయం కొన్ని నిమిషాలు మీకోసం కేటాయించండి. కిటికీ తెరిచి బయట వాతావరణాన్ని చూడండి. ప్రశాంతంగా కూర్చోండి. ఇష్టమైతే చిన్న ప్రార్థన చేసుకోండి లేదా నెమ్మదిగా శ్వాస తీసుకుంటూ ఉండండి.
రోజు ప్రారంభంలోనే ఇతరుల సందేశాలు, పనుల గురించి ఆలోచించకుండా కాసేపు మీ మనసుకు విశ్రాంతి ఇవ్వండి. ఈ చిన్న మార్పు రోజంతా ప్రశాంతంగా ఉండేందుకు తోడ్పడుతుంది.
2. సాయంత్రం దీపం వెలిగించండి
రోజంతా పని, ఇంటి బాధ్యతలతో అలసిపోతుంటాం. ఆ సమయంలో సాయంత్రం ఒక దీపం వెలిగించడం మంచి అలవాటుగా మారుతుంది. చాలామందికి ఇది ఆధ్యాత్మిక ఆచారం. మరికొందరికి రోజంతా ఎదురైన ఒత్తిడి నుంచి కాసేపు బయటపడే అవకాశంగా ఉపయోగపడుతుంది.
దీపం వెలిగించినప్పుడు ఆ రోజు ఎదురైన ఇబ్బందులు, పని ఒత్తిడిని కాసేపు పక్కన పెట్టండి. జరిగిన విషయాలన్నింటినీ మనసులో పెట్టుకుని రాత్రి వరకు బాధపడకుండా ప్రశాంతంగా ఉండేందుకు ప్రయత్నించండి.
3. భోజనం చేసే ముందు కృతజ్ఞత చెప్పండి
ఆకలిగా ఉన్నప్పుడు భోజనం ముందు కూర్చోగానే తినడం మొదలుపెడతాం. కానీ మొదటి ముద్ద తినే ముందు కొన్ని క్షణాలు ఆగండి. ఆ భోజనం తయారు చేసిన వ్యక్తిని గుర్తు చేసుకోండి. మనకు ఆహారం అందేందుకు కష్టపడిన రైతులు, ఇతరుల శ్రమను తలచుకోండి. లేదంటే మనకు తినడానికి ఆహారం ఉన్నందుకు మనసులోనే కృతజ్ఞత చెప్పుకోండి.
ఇది చిన్న విషయంలా అనిపించినా, మనం చేసే పనుల విలువను గుర్తించేందుకు సహాయపడుతుంది. రోజూ యాంత్రికంగా చేసే పనుల్లోనూ ఆనందాన్ని గుర్తించగలుగుతాం.
4. ఒక్కసారైనా ఫోన్‌ లేకుండా నడవండి
నడక అంటే వ్యాయామం చేయడం లేదా ఫోన్‌లో పాటలు, వీడియోలు వినడం మాత్రమే కాదు. అప్పుడప్పుడు ఫోన్‌ను పక్కన పెట్టి బయట నడవండి. ఆకాశం, చెట్లు, చుట్టూ ఉన్న మనుషులు, వారి మాటలు, రోడ్డుపై వినిపించే శబ్దాలను గమనించండి.
రోజూ చూసే పరిసరాలనే కొత్తగా గమనించే అవకాశం లభిస్తుంది. మనసును ప్రశాంతంగా ఉంచేందుకు ప్రతిసారీ ధ్యానం చేయాల్సిన అవసరం లేదు. మనం ఉన్న చోటును, చుట్టూ జరిగే విషయాలను శ్రద్ధగా గమనించడం కూడా మంచి అనుభూతిని ఇస్తుంది.
5. నిద్రపోయే ముందు ఓ మంచి విషయాన్ని గుర్తు చేసుకోండి
రోజంతా ఎన్ని పనులు చేసినా, ఎన్ని ఇబ్బందులు ఎదురైనా.. పడుకునే ముందు ఆ రోజు జరిగిన ఒక మంచి విషయాన్ని గుర్తు చేసుకోండి. ఎవరైనా ప్రేమగా మాట్లాడి ఉండొచ్చు. రుచికరమైన భోజనం చేసి ఉండొచ్చు. చాలా రోజులుగా వాయిదా వేస్తున్న పనిని పూర్తి చేసి ఉండొచ్చు. లేదంటే కాసేపు ప్రశాంతంగా గడిపి ఉండొచ్చు.
రోజంతా గొప్పగా గడవకపోయినా, గుర్తుంచుకోదగిన మంచి విషయం ఒక్కటైనా ఉంటుంది. దాన్ని గుర్తు చేసుకుంటూ నిద్రపోవడం వల్ల రోజును సానుకూలంగా చూసే అలవాటు పెరుగుతుంది.
చిన్న అలవాట్లలోనే అసలైన ఆనందం!
ఈ ఐదు పనుల కోసం ఎక్కువ సమయం కేటాయించాల్సిన అవసరం లేదు. పెద్ద మార్పులు చేసుకోవాల్సిన పనీ లేదు. ఉదయం ఫోన్‌కు దూరంగా ఉండటం, సాయంత్రం దీపం వెలిగించడం, భోజనానికి కృతజ్ఞత చెప్పడం, ఫోన్‌ లేకుండా నడవడం, రాత్రి ఓ మంచి విషయాన్ని గుర్తు చేసుకోవడం.. ఇవన్నీ సులభంగా అలవాటు చేసుకోవచ్చు.
ఈ చిన్న పనులు ఒక్కరోజులోనే జీవితాన్ని మార్చేయకపోవచ్చు. కానీ మన చుట్టూ ఇప్పటికే ఉన్న మంచి విషయాలను గుర్తించడం నేర్పుతాయి. ప్రతి రోజును మరింత ప్రశాంతంగా, ఆనందంగా గడిపేందుకు దోహదపడతాయి.
