హైదరాబాద్ కన్జ్యూమర్ టెక్నాలజీ బ్రాండ్ మివీ (MIVI) స్మార్ట్‌ఫోన్ మార్కెట్లోకి అడుగుపెట్టింది. ‘మివీ వన్ 5G’ పేరుతో తన తొలి స్మార్ట్‌ఫోన్‌ను బుధవారం ఆవిష్కరించింది. త్వరలో ప్రారంభం కానున్న ఫ్లిప్‌కార్ట్ బిగ్ బిలియన్ డేస్ సేల్‌లో ఈ ఫోన్ ప్రత్యేకంగా అమ్మకానికి అందుబాటులో ఉండనుంది. బ్యాంక్ ఆఫర్లతో కలిపి దీని ప్రారంభ ధర రూ.11,999గా కంపెనీ నిర్ణయించింది. “ప్రెట్టీ పవర్‌ఫుల్” అనే ట్యాగ్‌లైన్‌తో వస్తున్న ఈ ఫోన్, బడ్జెట్ ధరలో శక్తివంతమైన ఫీచర్లను అందిస్తోంది.
ఈ స్మార్ట్‌ఫోన్ క్వాల్‌కామ్ స్నాప్‌డ్రాగన్ 4 జెన్ 2 5G మొబైల్ ప్లాట్‌ఫామ్‌పై పనిచేస్తుంది. ప్రస్తుతం ఈ ధరల శ్రేణిలో స్నాప్‌డ్రాగన్ ప్రాసెసర్‌తో వస్తున్న ఏకైక 5G స్మార్ట్‌ఫోన్ ఇదేనని మివీ తెలిపింది. రోజువారీ పనులు, గేమింగ్, సోషల్ మీడియా వాడకానికి ఎలాంటి ఆటంకాలు లేకుండా ఈ ఫోన్ మెరుగైన పనితీరును కనబరుస్తుందని పేర్కొంది.
మివీ వన్ 5G స్మార్ట్‌ఫోన్ ఫీచర్ల విషయానికొస్తే, ఇందులో 120Hz రిఫ్రెష్ రేట్‌తో కూడిన 6.75-అంగుళాల HD డిస్‌ప్లే, 50-మెగాపిక్సెల్ డ్యూయల్ రియర్ కెమెరా, 8-మెగాపిక్సెల్ ఫ్రంట్ కెమెరా ఉన్నాయి. 18W ఫాస్ట్ ఛార్జింగ్‌కు సపోర్ట్ చేసే 6,000mAh భారీ బ్యాటరీని అమర్చారు.
ఈ ఫోన్ స్టాక్ ఆండ్రాయిడ్ 16 ఆపరేటింగ్ సిస్టమ్‌పై నడుస్తుంది. దుమ్ము, నీటి తుంపరల నుంచి రక్షణ కోసం IP64 రేటింగ్, సైడ్-మౌంటెడ్ ఫింగర్‌ప్రింట్ సెన్సార్, కాల్స్ నాణ్యతను మెరుగుపరిచేందుకు క్లియర్‌టాక్ నాయిస్-రిడక్షన్ టెక్నాలజీ వంటి అదనపు ఫీచర్లు కూడా ఉన్నాయి.
ఈ ఫోన్ బ్లూ, పింక్, గ్రీన్, బర్గండీ, నేవీ బ్లూ అనే ఐదు రంగులలో లభిస్తుంది. ఫ్లిప్‌కార్ట్ సేల్‌లో భాగంగా 4GB RAM + 128GB స్టోరేజ్ వేరియంట్‌ను రూ.11,999 (అసలు ధర రూ.14,999)కు, 6GB + 128GB వేరియంట్‌ను రూ.13,499 (అసలు ధర రూ.15,999)కు, 8GB + 128GB వేరియంట్‌ను రూ.14,999 (అసలు ధర రూ.16,999)కు కొనుగోలు చేయవచ్చు.
అక్టోబర్ 8 అర్ధరాత్రి నుంచి ఫ్లిప్‌కార్ట్ ప్లస్, వీఐపీ సభ్యులకు ఎర్లీ యాక్సెస్ ఉంటుంది. అక్టోబర్ 9 నుంచి అందరికీ అందుబాటులోకి వస్తుంది.
ఈ సందర్భంగా మివీ చీఫ్ బిజినెస్ ఆఫీసర్ హిమాన్షు టాండన్ మాట్లాడుతూ, “మివీ వన్ 5G విడుదలతో స్మార్ట్‌ఫోన్ విభాగంలోకి అడుగుపెట్టడం మాకు ఒక ముఖ్యమైన మైలురాయి. నమ్మకమైన పనితీరు, 5G కనెక్టివిటీ, శక్తివంతమైన బ్యాటరీ, క్లీన్ ఆండ్రాయిడ్ అనుభవంతో, ముఖ్యంగా పండుగ సీజన్‌లో వినియోగదారులకు ప్రతి రోజూ ఉపయోగపడే విలువైన ఫీచర్లను అందించడమే మా లక్ష్యం” అని వివరించారు.
