భద్రాచలం, సెప్టెంబర్ 26: భద్రాచలం వద్ద గోదావరి నీటిమట్టం శనివారం సాయంత్రం 7 గంటలకు 30.00 అడుగులకు చేరింది. ఈ సమయంలో నది ప్రవాహం 4,37,893 క్యూసెక్కులుగా నమోదైంది.
ప్రస్తుతం గోదావరి నీటిమట్టం మొదటి ప్రమాద హెచ్చరిక స్థాయికి దిగువన ఉంది. భద్రాచలం వద్ద మొదటి ప్రమాద హెచ్చరికను 43 అడుగుల వద్ద జారీ చేస్తారు. ఈ స్థాయికి చేరే సమయంలో సుమారు 9,32,288 క్యూసెక్కుల ప్రవాహం నమోదవుతుంది.
అదేవిధంగా రెండో ప్రమాద హెచ్చరిక స్థాయి 48 అడుగులు కాగా, ఈ సమయంలో 11,44,645 క్యూసెక్కుల ప్రవాహం ఉంటుంది. మూడో ప్రమాద హెచ్చరిక స్థాయి 53 అడుగులు, ప్రవాహం 14,26,684 క్యూసెక్కులు.
గతంలో భారీ వరదలు
భద్రాచలం వద్ద గోదావరి చరిత్రలో 1986లో అత్యధిక వరద నమోదైంది. ఆ సమయంలో నీటిమట్టం 75.60 అడుగులకు, ప్రవాహం 27.02 లక్షల క్యూసెక్కులకు చేరింది.
ఇక 2022లో భారీ వరదల సమయంలో భద్రాచలం వద్ద గోదావరి నీటిమట్టం 71.30 అడుగులకు, ప్రవాహం 24.43 లక్షల క్యూసెక్కులకు చేరింది.
ప్రస్తుతం నీటిమట్టం 30 అడుగుల వద్ద కొనసాగుతున్న నేపథ్యంలో సంబంధిత అధికారులు పరిస్థితిని పర్యవేక్షిస్తున్నారు.
