ఏడూళ్ల బయ్యారం, సెప్టెంబర్ 2: దివంగత ముఖ్యమంత్రి డాక్టర్ వై.ఎస్. రాజశేఖరరెడ్డి 17వ వర్ధంతి సందర్భంగా పినపాక మండలం ఏడూళ్ల బయ్యారం ఎక్స్రోడ్లోని వైఎస్సార్ విగ్రహానికి భద్రాద్రి కొత్తగూడెం జిల్లా కాంగ్రెస్ పార్టీ డీసీసీ ఆర్గనైజేషన్ సెక్రటరీ బోడ రమేష్ పూలమాల వేసి ఘనంగా నివాళులర్పించారు.
ఈ సందర్భంగా ఆయన మాట్లాడుతూ, పేదల సంక్షేమం కోసం తన జీవితాన్ని అంకితం చేసిన మహానేత వైఎస్సార్ ప్రజల గుండెల్లో చిరస్థాయిగా నిలిచిపోయారని అన్నారు. రైతుల కోసం ఉచిత విద్యుత్, పేదలకు మెరుగైన వైద్య సేవల కోసం ఆరోగ్యశ్రీ, విద్యార్థులకు ఫీజు రీయింబర్స్మెంట్, అత్యవసర వైద్య సేవల కోసం 108, 104 వంటి పథకాలను ప్రవేశపెట్టి కోట్లాది కుటుంబాలకు భరోసాగా నిలిచారని గుర్తు చేశారు.
వైఎస్సార్ ఒక ముఖ్యమంత్రి మాత్రమే కాకుండా పేదల జీవితాల్లో వెలుగులు నింపిన ప్రజానాయకుడని బోడ రమేష్ పేర్కొన్నారు. పాదయాత్ర ద్వారా ప్రజల సమస్యలను స్వయంగా తెలుసుకుని, అధికారంలోకి వచ్చిన తర్వాత వాటి పరిష్కారానికి కృషి చేసిన నాయకుడిగా ఆయన చరిత్రలో నిలిచిపోయారని చెప్పారు.
ప్రజా సంక్షేమం, రైతుల అభ్యున్నతి, విద్యార్థులు, మహిళలు, బలహీన వర్గాల అభివృద్ధి కోసం వైఎస్సార్ చూపిన మార్గం నేటి తరానికి స్ఫూర్తిదాయకమని అన్నారు. వైఎస్సార్ ఆశయాలను సజీవంగా ఉంచాలంటే ప్రజల కోసం పనిచేయడం, అణగారిన వర్గాలకు అండగా నిలవడం, సామాజిక న్యాయం కోసం పోరాడడం అవసరమని పేర్కొన్నారు.
కాంగ్రెస్ పార్టీ నాయకులు, కార్యకర్తలు ఐక్యంగా పనిచేస్తూ ప్రజా సమస్యల పరిష్కారం కోసం నిరంతరం కృషి చేయాలని ఆయన పిలుపునిచ్చారు. ప్రజల కష్టాల్లో అండగా నిలిచి, సేవా రాజకీయాలను కొనసాగించడమే వైఎస్సార్కు నిజమైన నివాళి అని అన్నారు.
ఈ కార్యక్రమంలో మండల కాంగ్రెస్ పార్టీ ఉపాధ్యక్షులు కొంబత్తిని శ్రీనివాసరావు, మండల మైనార్టీ అధ్యక్షులు ఎస్.కె. మదర్ సాహెబ్, మండల ఎస్టీ సెల్ అధ్యక్షులు యాలం బుజ్జిబాబు, జక్క వెంకటేశ్వర్లు, కాంగ్రెస్ పార్టీ నాయకులు, కార్యకర్తలు పాల్గొన్నారు.
