అటవీ శాఖ వేధింపులు ఆపాలి: మాజీ జెడ్పిటిసి పాల్వంచ దుర్గ

బయ్యారం రేంజ్ అధికారులపై విచారణ జరపాలని డిమాండ్
పోడు రైతుల నుంచి అక్రమ వసూళ్లు, విలేకరుల బెదిరింపులపై ఆగ్రహం

పినపాక, జూలై 14 (వై7 న్యూస్): బయ్యారం రేంజ్ పరిధిలో అటవీశాఖ అధికారుల తీరుపై మాజీ జెడ్పిటిసి పాల్వంచ దుర్గ తీవ్ర ఆరోపణలు చేశారు. అడవిని సంరక్షించాల్సిన అధికారులే అక్రమాలకు అండగా నిలుస్తూ పోడు రైతులను వేధిస్తున్నారని ఆమె విమర్శించారు.

మంగళవారం మీడియాతో మాట్లాడిన ఆమె, స్థానికంగా నివాసం లేకుండానే ఏజెన్సీ అలవెన్స్ పొందుతున్న అటవీశాఖ ఉద్యోగులపై ప్రభుత్వం, విజిలెన్స్ అధికారులు వెంటనే విచారణ చేపట్టి బాధ్యులపై కఠిన చర్యలు తీసుకోవాలని డిమాండ్ చేశారు. గతంలో ఆర్టీఐ ద్వారా సమాచారం కోరగా, స్థానికంగానే నివాసం ఉంటున్నట్లు తప్పుడు వివరాలు అందించారని ఆరోపించారు.

పోడు రైతుల నుంచి కోళ్లు, మేకలు, నగదు రూపంలో వసూళ్లు చేస్తున్నారనే ఫిర్యాదులు చాలా కాలంగా వస్తున్నాయని దుర్గ పేర్కొన్నారు. వాచర్ల ద్వారా రైతుల నుంచి డబ్బులు వసూలు చేస్తున్నారనే విషయాన్ని గతంలోనే బయ్యారం రేంజ్ అధికారి స్నేహలత దృష్టికి తీసుకెళ్లినా ఎలాంటి చర్యలు తీసుకోలేదని అన్నారు. పైగా వాచర్లతో అసభ్యకరంగా మాట్లాడించేలా ప్రోత్సహిస్తున్నారనే అనుమానాలు వ్యక్తమవుతున్నాయని తెలిపారు.

అటవీశాఖ ఉద్యోగుల అవినీతి, అక్రమాలపై ఉన్నతాధికారుల దృష్టికి తీసుకెళ్లినా స్పందన లేకపోవడం అనేక అనుమానాలకు తావిస్తోందని ఆమె విమర్శించారు. వాచర్ల ద్వారా అక్రమ వసూళ్లు జరిగాయనే ఆరోపణలపై బయ్యారం రేంజ్ ఆఫీసర్ స్నేహలతపై పూర్తి స్థాయి విచారణ జరిపి, విచారణ పూర్తయ్యే వరకు ఆమెను విధుల నుంచి తప్పించాలని డిమాండ్ చేశారు.

అడవిలో జరుగుతున్న అక్రమాలను వెలుగులోకి తీసుకురావడానికి వెళ్లిన విలేకరులను అడవిలోకి రావద్దని, వస్తే కేసులు నమోదు చేస్తామని బెదిరించడం ప్రజాస్వామ్య విలువలకు విరుద్ధమని పాల్వంచ దుర్గ మండిపడ్డారు. వార్తల సేకరణ కోసం వెళ్లే విలేకరులను అడ్డుకునే హక్కు ఏ అధికారికీ లేదని స్పష్టం చేశారు.

బయ్యారం రేంజ్‌లో జరుగుతున్నట్లు తాను ఆరోపిస్తున్న అవినీతి, అక్రమాలపై ఇప్పటికే ఎఫ్‌డీఓ, డీఎఫ్‌ఓలకు ఫిర్యాదు చేసినట్లు తెలిపారు. ఈ వ్యవహారంపై స్వతంత్ర విచారణ జరిపి, బాధ్యులపై చట్టపరమైన చర్యలు తీసుకునే వరకు తమ పోరాటం కొనసాగుతుందని పాల్వంచ దుర్గ హెచ్చరించారు.