ఫేస్బుక్, ఇన్స్టాగ్రామ్లలో మీకు సంబంధం లేని కంటెంట్ వస్తుందని తరచుగా విసిగిపోతున్నారా? అయితే మీలాంటి యూజర్లకు మెటా (Meta) ఒక శుభవార్తను తీసుకువచ్చింది. ఇన్నాళ్లు మనకు ఏ కంటెంట్ చూపించాలనేది కేవలం సంస్థకు చెందిన అల్గారిథమ్ (Algorithm) మాత్రమే నిర్ణయించేది. మనకు నచ్చినా నచ్చకపోయినా అది చూపించే పోస్టులను చూడాల్సిందే. కానీ ఇప్పుడు ఆ విధానానికి స్వస్తి పలుకుతూ, ఫీడ్ను కంట్రోల్ చేసే ‘స్టీరింగ్ వీల్’ను మెటా నేరుగా యూజర్ల చేతికే అప్పగిస్తోంది.
ఈ కొత్త మార్పుతో వినియోగదారులు తమ ఫీడ్లో ఎలాంటి పోస్టులు, వీడియోలు లేదా రీల్స్ కనిపించాలనేది స్వయంగా డిసైడ్ చేసుకోవచ్చు. మీకు నచ్చిన కంటెంట్ గురించి ‘షో మోర్’ (Show More), అలాగే మీకు ఆసక్తి లేని కంటెంట్ వద్దనుకుంటే ‘షో లెస్’ (Show Less) అనే ఆప్షన్ల ద్వారా అల్గారిథమ్కు స్పష్టమైన సూచనలు ఇవ్వొచ్చు. దీని ద్వారా అనవసరమైన ప్రకటనలు, స్పామ్ లేదా సంబంధం లేని పేజీల నుంచి వచ్చే విసిగించే పోస్టులకు చెక్ పెట్టి, కేవలం మీకు ఇష్టమైన, మీకు ఉపయోగపడే విషయాలకే ఎక్కువ ప్రాధాన్యత ఇవ్వొచ్చు.
యూజర్ల ఫీడ్బ్యాక్, అభిరుచులకు అనుగుణంగా తమ ప్లాట్ఫామ్స్ను మరింత పారదర్శకంగా మార్చే ఉద్దేశంతోనే మెటా ఈ కీలక నిర్ణయం తీసుకుంది. మీ బ్రౌజింగ్ హిస్టరీని ఆధారం చేసుకుని యంత్రాలు మీ ఫీడ్ను నియంత్రించే రోజుల నుంచి.. మీరే మీకు కావాల్సిన కంటెంట్ను ఎంచుకునే స్వేచ్ఛ రావడం నిజంగా ఆహ్వానించదగ్గ పరిణామం. ఈ ఫీచర్లు పూర్తిస్థాయిలో వినియోగదారులందరికీ అందుబాటులోకి వస్తే, సోషల్ మీడియా అనుభవం మరింత ఆసక్తికరంగా మరియు మీ అభిరుచికి తగ్గట్లుగా మారుతుందని టెక్ నిపుణులు విశ్లేషిస్తున్నారు.
