ఆయిల్ పామ్ సాగు విస్తీర్ణం పెంచాలి ; జిల్లా కలెక్టర్ జితేష్ వి. పాటిల్

శాశ్వత ఆదాయానికి ఆయిల్ పామ్ ఉత్తమ మార్గం

సమీకృత వ్యవసాయం రైతులకు స్థిర జీవనోపాధి

కొత్తగూడెం
భద్రాద్రి కొత్తగూడెం జిల్లా కలెక్టర్ జితేష్ వి. పాటిల్ రైతులు తక్కువ పెట్టుబడితో ఎక్కువ లాభాలు అందించే ఆయిల్ పామ్ సాగుపై దృష్టి సారించాలని పిలుపునిచ్చారు. గురువారం ఐడీఓసీ కార్యాలయంలో నిర్వహించిన ఆయిల్ పామ్ అవగాహన సదస్సులో ఆయన ముఖ్య అతిథిగా పాల్గొని ప్రసంగించారు.

కలెక్టర్ మాట్లాడుతూ, “జిల్లాలో ఆయిల్ పామ్ సాగు విస్తీర్ణాన్ని పెంచేందుకు సమగ్ర కార్యాచరణ అవసరం,” అని తెలిపారు. ప్రస్తుతం 23 మండలాల్లో 21,329 మంది రైతులు 83,850 ఎకరాల్లో ఆయిల్ పామ్ సాగు చేస్తున్నారని వివరించారు. 2025-26 ఆర్థిక సంవత్సరానికి గాను నిర్ణయించిన 14,500 ఎకరాల లక్ష్యంలో ఇప్పటివరకు 8,163 ఎకరాలను సాధించామని చెప్పారు.

జిల్లాలోని 21 ప్రాథమిక వ్యవసాయ సహకార సంఘాల (PACS) పరిధిలో ప్రతి సంఘం కనీసం 100 ఎకరాల ఆయిల్ పామ్ సాగు లక్ష్యం సాధించాలని APC ఆదేశించారని కలెక్టర్ తెలిపారు. ఆయిల్ పామ్ పంట రైతులకు దీర్ఘకాలిక స్థిర ఆదాయం అందించే పంట అని ఆయన గుర్తుచేశారు.

జిల్లాలో సుమారు 80,000 ఎకరాల్లో మొక్కజొన్న సాగు జరుగుతోందని, అందులో కనీసం 10,000 ఎకరాల్లో ఆయిల్ పామ్ సాగు ప్రారంభించేలా రైతులను ప్రోత్సహించాలన్నారు. చిన్న, మధ్య తరహా రైతులు కనీసం ఒక ఎకరంలో ఆయిల్ పామ్ సాగు చేపట్టి, అంతర్పంటగా మునగ సాగు చేస్తే తక్కువ కాలంలోనే అదనపు ఆదాయం పొందవచ్చని సూచించారు.

ఆయిల్ పామ్ సాగులో ఎకరానికి 57 మొక్కలు నాటవలసి ఉంటుందని, దానికి సుమారు రూ.10,000–15,000 వరకు ఖర్చు అవుతుందని వివరించారు. అంతర్పంటగా మునగ సాగు చేస్తే ఏడు నెలల్లోనే పంట చేతికి వచ్చి ఆదాయం లభిస్తుంది అన్నారు.

> “రైతులు ఆయిల్ పామ్‌తో పాటు కూరగాయలు, పశుపోషణ, కోళ్ల పెంపకం వంటి సమీకృత వ్యవసాయ పద్ధతులు అనుసరిస్తే ఆదాయం విభిన్న మార్గాల్లో లభిస్తుంది. ఇది రైతు కుటుంబాలకు స్థిర జీవనోపాధిని అందిస్తుంది,”
– కలెక్టర్ జితేష్ వి. పాటిల్

ఈ సందర్భంగా కలెక్టర్ మొగల్రాళ్ల గొప్ప గ్రామానికి చెందిన రైతు కొర్స వెంకటమ్మ అవలంబిస్తున్న సమీకృత వ్యవసాయ పద్ధతులను అభినందించారు. ఆమె విధానం ఇతర రైతులకు ఆదర్శంగా నిలవాలని సూచించారు.

జిల్లాలో ఆయిల్ పామ్ విస్తీర్ణం పెరుగుదలతో కలెక్షన్ పాయింట్ల ఏర్పాటు సాధ్యమవుతుందని పేర్కొన్నారు. వ్యవసాయ శాఖ మంత్రి తుమ్మల నాగేశ్వరరావు చొరవతో దమ్మపేట మండలంలో ప్రారంభించిన ఉపగ్రహ ఆధారిత మోడల్ ఆయిల్ పామ్ ప్రాజెక్ట్ ద్వారా మొక్కల పెరుగుదలను సాంకేతిక పద్ధతిలో పర్యవేక్షించడం సులభమవుతుందని వివరించారు.

ప్రభుత్వం ఆయిల్ పామ్ సాగుకు అనేక ప్రోత్సాహకాలు, సబ్సిడీలు అందిస్తున్నదని కలెక్టర్ పేర్కొని, రైతులు వాటిని సద్వినియోగం చేసుకోవాలని సూచించారు. జిల్లాలో ఆయిల్ పామ్ సాగును ప్రోత్సహించిన మూడు ప్రాథమిక వ్యవసాయ సహకార సంఘాలను గుర్తించి సోలార్ డ్రైయర్లు బహుమతిగా అందజేయనున్నట్లు ప్రకటించారు.

“ప్రతి మండలంలో ఆదర్శ రైతులను గుర్తించి వారి విజయగాథలను ఇతరులతో పంచుకోవాలి. ఆయిల్ పామ్ సాగు, అంతర్పంటలు, పశుపోషణ వంటి సమీకృత వ్యవసాయ పద్ధతులు రైతు జీవన ప్రమాణాలను మెరుగుపరుస్తాయి,” అని కలెక్టర్ అన్నారు.

ఈ కార్యక్రమంలో జిల్లా ఉద్యానవన శాఖ అధికారి కిషోర్, వ్యవసాయ శాఖ అధికారి బాబురావు, సహకార శాఖ అధికారి శ్రీనివాస్, గోద్రెజ్ ప్రైవేట్ లిమిటెడ్ జిల్లా ఇన్‌చార్జ్ రామకృష్ణ, ఉద్యానవన, వ్యవసాయ, సహకార శాఖల అధికారులు, PACS ప్రతినిధులు, తెలంగాణ ఆయిల్ ఫెడ్ మరియు గోద్రెజ్ ప్రైవేట్ లిమిటెడ్ సంస్థల ప్రతినిధులు పాల్గొన్నారు.