మణుగూరు సింగరేణిలో అధికారి పెత్తనం… బాధితుల గోడు ఎవరూ వినరా?

మణుగూరు, వై 7న్యూస్ (బానోత్ మధు ప్రతినిధి);

సింగరేణి కాలరీస్‌లో డిపెండెంట్ ఉద్యోగాల కోటాలో నియామకాల్లో విస్తృత స్థాయిలో అవకతవకలు చోటుచేసుకుంటున్నాయని ఆరోపణలు వెల్లువెత్తుతున్నాయి. మణుగూరులో ఒక ప్రముఖ అధికారి నిబంధనలు అతిక్రమించి తన పెత్తనాన్ని కొనసాగిస్తున్నాడంటూ బాధితులు ఆవేదన వ్యక్తం చేస్తున్నారు.

ఇటీవల బదిలీ అయినప్పటికీ, మణుగూరులోనే నియంత్రణ కొనసాగించాలని చూస్తున్న ఆ అధికారి, కొత్తగూడెం వరకు ప్రభావం చూపుతూ, ఉద్యోగాల విషయంలో నిబంధనలు పక్కనబెట్టి ప్రైవేట్ విధానాన్ని అవలంబిస్తున్నాడని విశ్వసనీయ సమాచారం. “నా కనుసన్నల్లోనే అన్నీ జరగాలి” అన్న ధోరణితో బాధితులను బెదిరిస్తున్నట్టు పలువురు ఆరోపిస్తున్నారు.

డిపెండెంట్ ఉద్యోగాల్లో అవినీతి?

కార్మికుల కుటుంబాల కోసం ఉన్న డిపెండెంట్ ఉద్యోగాలను కొందరు అధికారులు వాణిజ్య అవకాశాలుగా మలుచుకుంటుండటం నిజంగా ఆందోళన కలిగిస్తున్న విషయం. అర్హతల పరిశీలన ప్రక్రియను తారుమారు చేస్తూ, తమకు అనుకూలంగా వ్యవహరించని అభ్యర్థులను అవమానపరిచే దాకా వెళ్తున్నారని బాధితులు వాపోతున్నారు.

స్థానిక అధికారుల అండతో పెత్తనం కొనసాగింపు

ఆ అధికారికి మణుగూరులోని కొందరు ఇతర అధికారులు పూర్తి మద్దతు ఇస్తుండటంతో, అతడు అధికారికంగా బదిలీ అయినా మణుగూరులో పెత్తనం కొనసాగిస్తున్నాడు. ఇది న్యాయబద్ధ నియామకాలపై ప్రశ్నలు లేవనెత్తేలా చేస్తోంది.

సింగరేణి సీఎండీకి బాధితుల విజ్ఞప్తి

ఈ వ్యవహారాన్ని సింగరేణి సీఎండీ దృష్టికి తీసుకెళ్లే ప్రయత్నాలు జరుగుతున్నాయి. బాధితులు ఇప్పటికే నివేదిక సిద్ధం చేసినట్లు తెలుస్తోంది. ఈ వ్యవహారంపై నిష్పక్షపాత విచారణ జరిపి, బాధితులకు న్యాయం జరిగేలా చూడాలని వారు కోరుతున్నారు.

ఇంకా బహిరంగం కాని వివరాలు త్వరలో…

ఈ వ్యవహారంలోని కీలక పాత్రధారుల పేర్లు, చర్యలు, సంబంధాలు మొదలైన వివరాలతో కూడిన మరో ప్రత్యేక కథనం త్వరలో వెలుగులోకి రానుంది. సత్యాన్ని వెలికితీయడం కోసం జర్నలిజం ఉన్నత ప్రమాణాలను పాటిస్తూ మరిన్ని వివరాలు మీ ముందుకు తీసుకురాబోతున్నాం.