పలాస, ఆగస్టు 8 (వై7 న్యూస్): ఆంధ్రప్రదేశ్లో యువతకు జరుగుతున్న అన్యాయాలకు నిరసనగా మాజీ ముఖ్యమంత్రి, వైఎస్సార్సీపీ జాతీయ అధ్యక్షుడు వై ఎస్ జగన్మోహన్ రెడ్డి పిలుపు మేరకు రాష్ట్రవ్యాప్తంగా కొనసాగుతున్న రిలే నిరాహార దీక్షల్లో భాగంగా పలాసలో శనివారం 3వ రోజు దీక్షలు నిర్వహించారు.
మాజీ మంత్రి డాక్టర్ సీదిరి అప్పలరాజు ఆదేశాల మేరకు నిర్వహించిన ఈ కార్యక్రమానికి పలాస నియోజకవర్గ పరిశీలకులు ఎన్ని ధనుంజయ, శ్రీదేవి, సమాచార సాంకేతిక విభాగం అధ్యక్షుడు బత్తిని లక్ష్మణ్ హాజరై దీక్షా శిబిరానికి సంఘీభావం తెలిపారు.
ఈ సందర్భంగా నాయకులు మాట్లాడుతూ ఉపాధ్యాయ నియామక పరీక్షలలో జరిగిన అక్రమాలపై కేంద్ర దర్యాప్తు సంస్థతో విచారణ జరిపించాలని డిమాండ్ చేశారు. అలాగే ఈ వ్యవహారంలో నైతిక బాధ్యత వహిస్తూ విద్యాశాఖ మంత్రి నారా లోకేష్ రాజీనామా చేయాలని కోరారు.
రాష్ట్రంలో విద్యార్థులకు ప్రభుత్వం చెల్లించాల్సిన విద్యా రుసుముల తిరిగి చెల్లింపు, వసతి దీవెన బకాయిలను వెంటనే విడుదల చేయాలని, నిరుద్యోగులకు ఇచ్చిన హామీ మేరకు ఉద్యోగం కల్పించే వరకు నెలకు రూ.3,000 నిరుద్యోగ భృతి అందించాలని డిమాండ్ చేస్తూ 3వ రోజు రిలే నిరాహార దీక్షలను కొనసాగించారు.
