సాంకేతిక పరిజ్ఞానం యువత చేతిలో కొత్త పుంతలు తొక్కుతోంది అనడానికి నిదర్శనంగా నిలుస్తున్నాడు 16 ఏళ్ల భారతీయ టెక్ క్రియేటర్ రిదిత్ కుమావత్. ప్రముఖ హాలీవుడ్ చిత్రం ‘ఐరన్ మ్యాన్’లోని ఆర్టిఫిషియల్ ఇంటెలిజెన్స్ అసిస్టెంట్ ‘జార్విస్’ స్ఫూర్తితో తన పడక గదిని ఒక స్మార్ట్ స్పేస్ గా మార్చేశాడు. ఇంటర్నెట్ కనెక్షన్ అవసరం లేకుండా కేవలం మాటలతోనే లైట్లు, ఫ్యాన్లు, ఇతర పరికరాలను నియంత్రించే ఒక అద్భుతమైన వాయిస్ కంట్రోల్ సిస్టమ్‌ను అభివృద్ధి చేశాడు.
ఈ యువ ఆవిష్కర్త తన ఇన్‌స్టాగ్రామ్ ఖాతా ‘@the_coder_16’లో పోస్ట్ చేసిన ఒక వీడియో ఇప్పుడు సోషల్ మీడియాలో వైరల్ అవుతోంది. ఆ వీడియోలో తన గదిలోని స్విచ్ బోర్డు పక్కన అమర్చిన ఒక చిన్న పరికరాన్ని చూపిస్తూ దాని పనితీరును వివరించాడు. దానికి అతను ‘జార్విస్’ అని పేరు పెట్టాడు. “లైట్ ఆన్”, “ఫ్యాన్ ఆఫ్”, “స్టడీ మోడ్”, “గుడ్ నైట్” వంటి ఆదేశాలను ఇవ్వగానే, ఆ పరికరం తక్షణమే స్పందించి ఆ పనులను పూర్తి చేస్తోంది. దీనివల్ల ప్రతిసారీ స్విచ్ బోర్డు దగ్గరకు వెళ్లి పనిచేయాల్సిన అవసరం తప్పుతుంది.
ఈ సిస్టమ్ ప్రత్యేకత ఏమిటంటే ఇది పూర్తిగా ఆఫ్ లైన్ లో పనిచేయడం. దీని కోసం ఎలాంటి ఇంటర్నెట్ కనెక్షన్ లేదా ఖరీదైన పరికరాలు అవసరం లేదు. మైక్రోఫోన్, రిలే మాడ్యూల్స్ వంటి సాధారణ ఎలక్ట్రానిక్ భాగాలను ఉపయోగించి దీనిని రూపొందించాడు. వినియోగదారులు ఇచ్చే వాయిస్ కమాండ్స్ ను మైక్రోఫోన్ గ్రహించి, వెంటనే ఆ ఆదేశాలను అమలు చేస్తుంది. ఇది సైన్స్ ఫిక్షన్ కాన్సెప్ట్‌ను చాలా తక్కువ ఖర్చుతో, ఆచరణాత్మకమైన హోమ్ ఆటోమేషన్ ప్రాజెక్ట్‌గా మార్చడం విశేషం.
రిదిత్ కుమావత్ సృష్టించిన ఈ ఆవిష్కరణ సోషల్ మీడియాలో వైరల్ అవ్వడమే కాకుండా అనేక భారతీయ వార్తా సంస్థల దృష్టిని ఆకర్షించింది. నేటి యువతకు టెక్నాలజీపై ఉన్న పట్టు, వారిలోని సృజనాత్మకతకు ఇది ఒక చక్కటి ఉదాహరణగా నిలుస్తోంది. సంక్లిష్టమైన సాంకేతిక ఆలోచనలను కూడా రోజువారీ జీవితంలో ఉపయోగపడే సరళమైన పరిష్కారాలుగా మార్చవచ్చని రిదిత్ నిరూపించాడు.
