పలాస, వై7 న్యూస్ ప్రతినిధి
పర్యావరణ పరిరక్షణ కోసం వినాయక చవితి సందర్భంగా మట్టి విగ్రహాలనే వినియోగించాలని ప్రభుత్వం విస్తృతంగా ప్రచారం చేస్తున్నప్పటికీ, వాటిని తయారు చేసే సంప్రదాయ కళాకారుల పరిస్థితి మాత్రం రోజురోజుకూ దయనీయంగా మారుతోంది. శ్రీకాకుళం జిల్లా కాశీబుగ్గ పూజారి వీధిలో సుమారు 150 ఏళ్లుగా మట్టి వినాయక విగ్రహాల తయారీని జీవనోపాధిగా కొనసాగిస్తున్న మూడు నుంచి నాలుగు కుటుంబాలు ప్రస్తుతం అనేక ఆర్థిక, సామాజిక సవాళ్లను ఎదుర్కొంటున్నాయి.
ప్రభుత్వాలు ప్లాస్టర్ ఆఫ్ పారిస్ (POP) విగ్రహాల వినియోగాన్ని నిరుత్సాహపరుస్తూ మట్టి విగ్రహాల ప్రాధాన్యతను ప్రచారం చేస్తున్నప్పటికీ, ఆ ప్రచారం క్షేత్రస్థాయిలో పూర్తిగా ఫలించడం లేదని కళాకారులు ఆవేదన వ్యక్తం చేస్తున్నారు. మరోవైపు మట్టి విగ్రహాల తయారీకి అవసరమైన మట్టి, గడ్డి, కర్రలు, రంగులు, అలంకరణ సామగ్రి ధరలు గణనీయంగా పెరగడంతో తయారీ వ్యయం భారంగా మారిందని చెబుతున్నారు.
మట్టి విగ్రహాల తయారీకి నాలుగు నుంచి ఐదు రోజుల సమయం పట్టడంతో పాటు ఎంతో శ్రమ అవసరమవుతుందని, అయినప్పటికీ కొనుగోలుదారులు అధికంగా POP విగ్రహాల వైపు మొగ్గు చూపుతున్నారని కళాకారులు పేర్కొంటున్నారు. మట్టి విగ్రహాల ధరల విషయంలో వినియోగదారులు తీవ్ర బేరసారాలు చేయడం వల్ల తమకు తగిన లాభం కూడా మిగలడం లేదని వాపోతున్నారు.
ఈ సందర్భంగా కళాకారుడు రామ్కుమార్ పండా మాట్లాడుతూ, తమ కుటుంబం సుమారు 50 సంవత్సరాలుగా ఈ వృత్తిపై ఆధారపడి జీవిస్తోందని, తాను గత 40 సంవత్సరాలుగా మట్టి వినాయక విగ్రహాల తయారీలో కొనసాగుతున్నానని తెలిపారు. ఈ ఏడాది ఎదురైన ఇబ్బందులు గతంలో ఎన్నడూ ఎదురుకాలేదని, ముఖ్యంగా కరోనా అనంతరం పరిస్థితులు మరింత కష్టతరంగా మారాయని చెప్పారు.
ప్రస్తుత పరిస్థితులు కొనసాగితే భవిష్యత్తులో మట్టి విగ్రహాల తయారీ వృత్తి కొనసాగుతుందా లేదా అనే అనుమానం కలుగుతోందని ఆయన ఆందోళన వ్యక్తం చేశారు. ప్రభుత్వం కేవలం ప్రచారాలకే పరిమితం కాకుండా మట్టి విగ్రహాల తయారీదారులకు ఆర్థిక సహాయం, ముడి పదార్థాల సబ్సిడీలు, ప్రత్యేక ప్రోత్సాహకాలు అందించి ఈ సంప్రదాయ కళను కాపాడాలని కళాకారులు కోరుతున్నారు.
పర్యావరణ హితమైన మట్టి వినాయక విగ్రహాలను ప్రోత్సహించాలంటే వాటిని తయారు చేసే కళాకారుల జీవనోపాధిని కూడా పరిరక్షించాల్సిన అవసరం ఉందని స్థానికులు అభిప్రాయపడుతున్నారు. ప్రస్తుతం ప్రభుత్వ సహకారం కోసం కళాకారులు ఎదురుచూస్తున్నారు.
