కుల దురాహంకార హత్యపై కెవిపిఎస్ ఆగ్రహం

నిందితులకు కఠిన శిక్ష డిమాండ్

సూర్యాపేట:

రంగారెడ్డి జిల్లా ఎల్లంపల్లి గ్రామంలో దళిత యువకుడు ఎర్ర రాజశేఖర్‌ను కుల దురాహంకారంతో హత్య చేసిన ఘటనపై కెవిపిఎస్ ఆగ్రహం వ్యక్తం చేసింది. నిందితులను కఠినంగా శిక్షించాలని, కులాంతర వివాహితలకు రక్షణ చట్టం తీసుకురావాలని కెవిపిఎస్ జిల్లా ప్రధాన కార్యదర్శి కోట గోపి డిమాండ్ చేశారు.

సూర్యాపేటలోని నల్లాలబావి సెంటర్‌లో కెవిపిఎస్ రాష్ట్ర కమిటీ పిలుపు మేరకు నిరసన జరిగింది. రాజశేఖర్‌ను అర్ధరాత్రి కిడ్నాప్ చేసి, హత్య చేసి, పెట్రోలు పోసి దహనం చేయడం అమానుషమని గోపి ఖండించారు. పోలీసుల నిర్లక్ష్యమే ఈ దారుణానికి కారణమని ఆరోపించారు.

రాష్ట్రంలో ఇప్పటివరకు 142 కుల దురాహంకార హత్యలు జరిగినా ప్రభుత్వం స్పందించకపోవడం దుర్వాస్తవమని గోపి అన్నారు. రాజశేఖర్ కుటుంబానికి రూ.50 లక్షల పరిహారం, భార్యకు ప్రభుత్వ ఉద్యోగం, కుటుంబానికి రక్షణ కల్పించాలని డిమాండ్ చేశారు.

నిందితులకు శిక్ష విధించకపోతే పోలీస్ కార్యాలయాలను ముట్టడిస్తామని హెచ్చరించారు. నిరసన కార్యక్రమంలో జిల్లా నాయకులు డి.దుర్గారావు, వేల్పుల వెంకన్న, నరసింహరావు, నరసయ్య, నాగార్జున, బాలే బాబు, కిరణ్ తదితరులు పాల్గొన్నారు.