బరువు తగ్గాలంటే ఆహార నియమాలు పాటించాలి.. వ్యాయామం చేయాలి.. ఇవే కాదు, నిద్రపోయే సమయం కూడా కీలకమేనని తాజా అధ్యయనం వెల్లడించింది. ముఖ్యంగా ప్రీడయాబెటిస్‌ ఉన్నవారు రాత్రి త్వరగా నిద్రపోవడం వల్ల బరువు తగ్గే అవకాశాలు మెరుగుపడతాయని పరిశోధకులు గుర్తించారు. కేవలం ఎంతసేపు నిద్రపోతున్నామన్నదే కాదు.. ఏ సమయంలో నిద్రపోతున్నామన్నది కూడా శరీర బరువుపై ప్రభావం చూపుతుందని తేల్చారు.
దాదాపు 200 మందిపై అధ్యయనం
‘నర్సింగ్‌ రీసెర్చ్‌’ జర్నల్‌లో ప్రచురితమైన ఈ అధ్యయనంలో ప్రీడయాబెటిస్‌ ఉన్న దాదాపు 200 మంది పాల్గొన్నారు. వీరంతా రోజుకు 6.5 గంటల కంటే తక్కువ సమయం నిద్రపోయేవారు. పరిశోధకులు వీరిని రెండు బృందాలుగా విభజించారు. రెండు బృందాలకూ ఎనిమిది వారాల పాటు ఆరోగ్యకరమైన ఆహారం, శారీరక వ్యాయామం, ఒత్తిడి నియంత్రణపై శిక్షణ ఇచ్చారు. అయితే ఒక బృందానికి అదనంగా నిద్రపై ప్రత్యేక శిక్షణ అందించారు.
త్వరగా నిద్రపోతే మెరుగైన ఫలితాలు
నిద్ర శిక్షణ పొందినవారికి రోజూ ఒకే సమయానికి పడుకోవడం, క్రమంగా నిద్రపోయే సమయాన్ని ముందుకు మార్చుకోవడం వంటి సూచనలు ఇచ్చారు. మంచంపై ఇతర పనులు చేయకుండా నిద్రకు మాత్రమే ఉపయోగించేలా అలవాట్లు నేర్పించారు. ఎనిమిది వారాల తర్వాత రెండు బృందాల్లోనూ బరువు తగ్గినట్లు గుర్తించారు. అయితే నిద్రపై ప్రత్యేక శిక్షణ పొందినవారిలో నిద్ర నాణ్యత మెరుగుపడింది. పగటిపూట నిద్రమత్తు కూడా తగ్గింది.
ప్రతి గంట ముందుగా పడుకుంటే..
అధ్యయనంలో ఆసక్తికరమైన విషయం మరోటి వెలుగులోకి వచ్చింది. సాధారణంగా నిద్రపోయే సమయం కంటే ప్రతి గంట ముందుగా నిద్రపోయినవారు ఎనిమిది వారాల్లో సగటున 1.3 పౌండ్ల (సుమారు 0.59 కిలోలు) అదనపు బరువు తగ్గినట్లు పరిశోధకులు గుర్తించారు. రాత్రిపూట ఆలస్యంగా మేల్కొని ఉండేవారు అనవసరంగా తినే అవకాశం ఎక్కువ. త్వరగా నిద్రపోవడం వల్ల అర్ధరాత్రి చిరుతిళ్లు తినడం తగ్గుతుంది. శరీరంలో ఆకలిని నియంత్రించే హార్మోన్ల పనితీరు, జీవక్రియపై కూడా నిద్ర సమయం ప్రభావం చూపవచ్చని పరిశోధకులు వివరించారు.
షుగర్‌ తగ్గినట్లు లేని ఆధారాలు
అయితే త్వరగా నిద్రపోవడం వల్ల రక్తంలో చక్కెర స్థాయులు గణనీయంగా తగ్గినట్లు ఈ అధ్యయనంలో ఆధారాలు లభించలేదు. కాబట్టి ఇది ప్రీడయాబెటిస్‌కు చికిత్సగా భావించకూడదని పరిశోధకులు స్పష్టం చేశారు. సరైన ఆహారం, వ్యాయామం, వైద్యుల సూచనలతో పాటు క్రమబద్ధమైన నిద్ర అలవాట్లను పాటించడం మంచిదని సూచించారు.
