జొమాటో సహ వ్యవస్థాపకుడు దీపిందర్‌ గోయల్ తీసుకొస్తున్న బ్రెయిన్‌ మానిటరింగ్‌ పరికరం ‘టెంపుల్‌’ ధర వెల్లడైంది. తొలి బ్యాచ్‌ పరికరం ధర రూ.85,000గా ఉన్నట్లు ముందస్తు యాక్సెస్‌ ఆహ్వానాలు అందుకున్న వినియోగదారులు చెబుతున్నారు. ఈ ధరలో జీవితకాల సబ్‌స్క్రిప్షన్‌ కూడా ఉందని సమాచారం. 2026 నవంబర్‌ 1 నుంచి ప్రీ-ఆర్డర్లు ప్రారంభం కానున్నాయి. అయితే ధరతో పాటు ఇతర వివరాలను కంపెనీ ఇంకా అధికారికంగా ప్రకటించలేదు.
ముందస్తు యాక్సెస్‌కు ఎంపికైనవారు అందుకున్న ఆహ్వానాల్లో ఈ ధర ప్రస్తావన ఉన్నట్లు తెలుస్తోంది. సాధారణంగా ప్రీ-ఆర్డర్లు ప్రారంభం కావడానికి ముందే వీరు టెంపుల్‌ యాప్‌ ద్వారా పరికరాన్ని ఆర్డర్‌ చేసుకునే అవకాశం ఉంటుంది. తొలి బ్యాచ్‌లో పరిమిత సంఖ్యలోనే పరికరాలను అందుబాటులోకి తీసుకురానున్నారు. ప్రతి పరికరాన్ని ఆర్డర్‌ వచ్చిన తర్వాత ప్రత్యేకంగా తయారు చేయనున్నారు. తొలి బ్యాచ్‌లో ఎన్ని పరికరాలు ఉంటాయి? వాటి డెలివరీ ఎప్పటి నుంచి ప్రారంభమవుతుంది? అనే వివరాలను కంపెనీ ఇంకా వెల్లడించలేదు.
ఇంతకీ టెంపుల్‌ ఏం చేస్తుంది?
సాధారణ స్మార్ట్‌వాచ్‌లు అడుగులు, గుండె స్పందన, నిద్ర వంటి అంశాలను ట్రాక్‌ చేస్తాయి. అందుకు భిన్నంగా టెంపుల్‌ మెదడులో రక్తప్రసరణకు సంబంధించిన మార్పులను పర్యవేక్షించేందుకు రూపొందించారు. ఇందులోని ‘బ్రెయిన్‌ఫ్లో’ సాంకేతికత మెదడుకు రక్తప్రసరణ, ఆక్సిజన్‌ సరఫరాతో సంబంధమున్న సంకేతాలు, మానసిక శ్రమకు సంబంధించిన మార్పులను ట్రాక్‌ చేయడానికి ఉపయోగపడుతుంది.
ఈ పరికరాన్ని నుదురు, చెవి మధ్య తల పక్కభాగంలో అమర్చుకోవాలి. చర్మానికి అతికించే ‘గ్రిప్స్‌’ అనే ప్రత్యేక అంటుకునే టేపుల సాయంతో దీన్ని స్థిరంగా ఉంచుకోవచ్చు. రోజువారీ పనులు చేసేటప్పుడు, వ్యాయామం చేస్తున్నప్పుడు కూడా పరికరం జారిపోకుండా ఈ టేపులు ఉపయోగపడతాయని గోయల్ గతంలో వివరించారు.
టెంపుల్‌లో ‘ఎంట్రోపీ’ అనే స్కోరు కూడా ఉంటుంది. ఇది 1 నుంచి 250 మధ్య సంఖ్య రూపంలో శరీరంపై పడుతున్న శారీరక, జీవక్రియ సంబంధిత ఒత్తిడిని సూచించేందుకు రూపొందించారు. నిద్ర, వ్యాయామం, ఒత్తిడి, కెఫీన్‌ వంటి అంశాలు ఈ స్కోరుపై ప్రభావం చూపవచ్చు. అయితే ఇది వైద్య నిర్ధారణ కోసం రూపొందించిన పరికరం కాదు. ఆరోగ్య పర్యవేక్షణ, పరిశోధన అవసరాల కోసమే ఉద్దేశించినట్లు కంపెనీ పేర్కొంటోంది.
టెంపుల్‌ పరికరం ఆరు రంగుల్లో అందుబాటులోకి రానుంది. ట్రూ గోల్డ్‌, రోజ్‌ గోల్డ్‌, బ్లాక్‌ మిర్రర్‌, రియల్‌ జేడ్‌, డీప్‌ బ్లూ, పర్పుల్‌ ఫంక్‌ రంగులను కంపెనీ ప్రకటించింది. దీపిందర్‌ గోయల్ ఓ పాడ్‌కాస్ట్‌లో ఈ పరికరాన్ని ధరించి కనిపించడంతో ఇది తొలిసారి విస్తృతంగా చర్చలోకి వచ్చింది. బ్యాడ్మింటన్‌ క్రీడాకారిణి పీవీ సింధు కూడా మ్యాచ్‌ల సమయంలో దీన్ని ధరించింది.
ప్రీ-ఆర్డర్లకు ముందు రూ.85 వేల ధర వెలుగులోకి రావడంతో ఈ పరికరంపై ఆసక్తి చూపుతున్నవారికి కొంత స్పష్టత వచ్చినప్పటికీ, తుది ధర, తొలి బ్యాచ్‌ పరిమాణం, డెలివరీ గడువు వంటి అంశాలపై కంపెనీ అధికారిక ప్రకటన కోసం వేచి చూడాల్సిందే.
