భారత్-అమెరికా మధ్య వాణిజ్య ఒప్పందం త్వరలోనే ఖరారయ్యే అవకాశాలు కనిపిస్తున్నాయి. ఒప్పందాన్ని ఖరారు చేసేందుకు ఇరు దేశాలు చర్చలు జరుపుతున్నాయని, తుది దశకు చేరుకున్నామని అమెరికా విదేశాంగ మంత్రి మార్కో రూబియో తెలిపారు. మంగళవారం భారత్‌లో పర్యటించనున్న నేపథ్యంలో ఆయన ఈ వ్యాఖ్యలు చేశారు.
భారత్‌తో వాణిజ్య ఒప్పందాన్ని ప్రస్తుతం ఖరారు చేసే ప్రయత్నాల్లో ఉన్నామని, దీనికి చాలా దగ్గరగా ఉన్నామని రూబియో సోమవారం చెప్పారు. రష్యా నుంచి చమురు, గ్యాస్ కొనుగోలు చేస్తున్న దేశాలపై ఆంక్షల విషయంలోనూ ప్రపంచ ఇంధన సరఫరా, ధరలను పరిగణనలోకి తీసుకోవాల్సి ఉంటుందని వివరించారు.
గత కొన్ని నెలలుగా ప్రపంచవ్యాప్తంగా ఇంధన సరఫరా, ధరలపై ప్రభావాన్ని దృష్టిలో పెట్టుకుని కొన్ని ఆంక్షల నుంచి మినహాయింపులు ఇవ్వాల్సి వచ్చిందని రూబియో పేర్కొన్నారు. ఇంధనం కోసం ప్రత్యామ్నాయ మార్గాలను ఎంచుకోవడం కొన్ని దేశాలకు భౌగోళిక పరిస్థితుల కారణంగా కష్టమని చెప్పారు. విదేశాంగ విధాన నిర్ణయాలు తీసుకునేటప్పుడు ఈ అంశాలన్నింటినీ సమతుల్యం చేయాల్సి ఉంటుందని వివరించారు. వాణిజ్య ఒప్పందం కూడా అమెరికా అధ్యక్షుడి నిర్ణయాల్లో పరిగణనలోకి వచ్చే అంశాల్లో ఒకటని తెలిపారు.
భారత్-అమెరికా వాణిజ్య ఒప్పందంలో తొలి దశను ఖరారు చేసేందుకు ఇరు దేశాలు దగ్గరగా ఉన్నట్లు సమాచారం. అయితే అమెరికా వ్యవసాయ ఉత్పత్తులకు భారత మార్కెట్‌లో ప్రవేశం కల్పించే అంశం, ముఖ్యంగా పాల ఉత్పత్తుల విషయంలో అంగీకారం కుదరడం ఇంకా ప్రధాన సవాలుగా ఉంది.
ఈ ఒప్పందం ద్వారా భారత వస్తువులపై అమెరికా సుంకాలను తగ్గించి, మరింత స్థిరంగా ఉంచాలని భారత్ ఆశిస్తోంది. ప్రతిగా అమెరికా పారిశ్రామిక, వ్యవసాయ ఉత్పత్తులకు భారత మార్కెట్‌లో ఎక్కువ అవకాశాలు కల్పించే అంశంపై చర్చలు జరుగుతున్నాయి.
ఫిబ్రవరిలో ప్రకటించిన ప్రణాళిక ప్రకారం.. భారత వస్తువులపై అమెరికా పరస్పర సుంకాన్ని 25 శాతం నుంచి 18 శాతానికి తగ్గించింది. రష్యా చమురు కొనుగోళ్లకు సంబంధించి విధించిన అదనపు 25 శాతం సుంకాన్ని కూడా తొలగించింది. ప్రతిగా అమెరికా పారిశ్రామిక వస్తువులు, కొన్ని వ్యవసాయ ఉత్పత్తులపై సుంకాలను తగ్గించడం లేదా తొలగించడం గురించి భారత్ అంగీకరించింది.
కేంద్ర వాణిజ్య మంత్రి పీయూష్ గోయల్ గతంలో ఒప్పందం తొలి దశ ఖరారైందని, ప్రస్తుతం న్యాయపరమైన ముసాయిదా తయారీ జరుగుతోందని చెప్పారు. అయితే అమలు విషయంలో భారత్‌కు కలిగే ప్రయోజనాలపై స్పష్టత అవసరమని పేర్కొన్నారు. విదేశాంగ మంత్రి ఎస్. జైశంకర్ కూడా చర్చలు తుది దశకు చేరుకుంటున్నాయని గతంలో తెలిపారు.
మరోవైపు 2026 సెప్టెంబర్‌లో భారత్ వస్తు ఎగుమతులు 23 శాతం పెరిగి 44.4 బిలియన్ డాలర్లకు చేరాయి. ఇదే సమయంలో వాణిజ్య లోటు తగ్గింది.
