రోజంతా పని, ఒత్తిడి, ఆలోచనల తర్వాత శరీరానికి, మెదడుకు విశ్రాంతి ఇచ్చేది నిద్ర. అయితే మారుతున్న జీవనశైలితో చాలామంది మంచంపై పడుకున్నా వెంటనే నిద్రపోలేక ఇబ్బంది పడుతున్నారు. కొందరికి అరగంట నుంచి గంట వరకు నిద్ర పట్టకపోగా, మరికొందరు మధ్యలో మేల్కొన్న తర్వాత తిరిగి నిద్రపోవడం కష్టంగా ఉంటుంది. నిద్ర సరిగా లేకపోతే పగటిపూట అలసట, ఏకాగ్రత తగ్గడం, ఆలోచనల్లో స్పష్టత లేకపోవడం వంటి సమస్యలు ఎదురవుతాయి. తగినంత నిద్ర మానసిక ఆరోగ్యం, జ్ఞాపకశక్తి, ఆలోచనా సామర్థ్యానికి కూడా ముఖ్యమైనది.
నిద్రను మెరుగుపరచుకోవాలంటే ప్రతిరోజూ ఒకే సమయానికి పడుకోవడం, ఉదయం ఒకే సమయానికి లేవడం అలవాటు చేసుకోవాలి. సెలవు రోజుల్లోనూ ఈ సమయాలను సాధ్యమైనంతవరకు పాటించడం వల్ల శరీరంలోని బాడీ క్లాక్ క్రమబద్ధంగా ఉండేందుకు సహాయపడుతుంది. పెద్దలు సాధారణంగా రాత్రికి కనీసం 7 గంటల నిద్ర పొందేలా చూసుకోవాలి. పడుకునే ముందు కెఫీన్ వంటి ఉద్దీపన పదార్థాలను అధికంగా తీసుకోకుండా ఉండటం, రాత్రి భోజనాన్ని కూడా నిద్రకు చాలా దగ్గరగా తీసుకోకపోవడం ఉపయోగకరంగా ఉంటుంది.
అలాగే నిద్రకు ముందు మొబైల్, టీవీ, ల్యాప్టాప్ వంటి స్క్రీన్లను ఎక్కువగా చూడటం తగ్గించాలి. పడుకునే సమయానికి కొంత ముందుగానే స్క్రీన్ టైమ్ను తగ్గించి, గదిలో వెలుతురును కూడా తగ్గించడం మంచిది. బెడ్రూమ్ చీకటిగా, నిశ్శబ్దంగా, సౌకర్యవంతమైన ఉష్ణోగ్రతలో ఉండేలా చూసుకోవాలి. నిద్ర సమస్యలు తరచూ కొనసాగితే లేదా రోజువారీ పనితీరుపై ప్రభావం చూపితే వైద్య నిపుణులను సంప్రదించడం మంచిది.
