గ్యాస్ గోడౌన్ మేనేజర్ ఆత్మహత్య కేసులో ఆరుగురిపై కేసు నమోదు

లైంగిక వేధింపుల ఫిర్యాదు ఉపసంహరణకు కోటి రూపాయలు డిమాండ్ చేశారంటూ మృతుడి కుమార్తె ఫిర్యాదు

మహిళా ఉద్యోగి, ఆమె భర్తతో పాటు నలుగురు విలేకరులపై భద్రాచలం టౌన్ పోలీసుల కేసు

భద్రాచలం: పాల్వంచలో గ్యాస్ గోడౌన్ మేనేజర్‌గా పనిచేసిన అనంతుల లక్ష్మీనారాయణ ఆత్మహత్య కేసులో ఆరుగురిపై భద్రాచలం టౌన్ పోలీసులు కేసు నమోదు చేశారు. మృతుడి కుమార్తె అనంతుల మధులిక ఇచ్చిన ఫిర్యాదు మేరకు అక్టోబర్ 17న ఎఫ్‌ఐఆర్ నంబర్ 279/2026 నమోదు చేశారు. భారతీయ న్యాయ సంహిత (BNS) సెక్షన్లు 108, 190 కింద కేసు నమోదు చేసినట్లు ఎఫ్‌ఐఆర్‌లో పేర్కొన్నారు.

మహిళా ఉద్యోగిపై ఆరోపణలు

పాల్వంచలోని గ్యాస్ గోడౌన్‌లో మేనేజర్‌గా పనిచేస్తున్న తన తండ్రి లక్ష్మీనారాయణ, అక్కడ పనిచేస్తున్న మహిళా ఉద్యోగి రజిత వ్యవహారాలను ప్రశ్నించడంతో వివాదం మొదలైందని మధులిక తన ఫిర్యాదులో పేర్కొన్నట్లు సమాచారం. ఈ క్రమంలో రజిత తన తండ్రిపై లైంగిక వేధింపుల ఆరోపణలు చేస్తూ ఫిర్యాదు చేయడంతో ఆయన తీవ్ర మనస్తాపానికి గురయ్యారని ఆమె ఆరోపించారు.

ఫిర్యాదు ఉపసంహరణకు కోటి రూపాయలు డిమాండ్ చేశారంటూ..

తన తండ్రిపై చేసిన లైంగిక వేధింపుల ఫిర్యాదును ఉపసంహరించుకోవాలంటే కోటి రూపాయలు చెల్లించాలని మహిళా ఉద్యోగి రజిత, ఆమె భర్త నాయిని రాజేష్‌తో పాటు నలుగురు విలేకరులు నాగ చందు (10టీవీ), వెంకన్న (బిగ్ టీవీ), రవి (టీవీ9), కలీం వేధించారని మధులిక పోలీసులకు ఇచ్చిన ఫిర్యాదులో ఆరోపించారు.

ఈ వేధింపుల కారణంగానే తన తండ్రి ఆత్మహత్యకు పాల్పడ్డారని పేర్కొంటూ, సంబంధిత వ్యక్తులపై చర్యలు తీసుకోవాలని ఆమె కోరినట్లు తెలిసింది.

దర్యాప్తు చేపట్టిన పోలీసులు

మధులిక ఫిర్యాదు మేరకు భద్రాచలం టౌన్ పోలీసులు కేసు నమోదు చేసి దర్యాప్తు చేపట్టారు. ఈ కేసులో ఫిర్యాదులో పేర్కొన్న ఆరోపణలు ఇంకా నిర్ధారణ కావాల్సి ఉంది. పోలీసుల దర్యాప్తులో వెల్లడయ్యే అంశాలు, సేకరించే ఆధారాల ఆధారంగా తదుపరి చర్యలు తీసుకోనున్నారు.

గమనిక: ఈ వార్తలో పేర్కొన్న కోటి రూపాయల డిమాండ్, వేధింపులకు సంబంధించిన వివరాలు ఫిర్యాదుదారు చేసిన ఆరోపణలు మాత్రమే. నిందితులపై ఆరోపణలు న్యాయస్థానంలో నిరూపితం కావాల్సి ఉంది.